Duelu, de Lourdes Álvarez

 

El calamentu ehí fuera,

ehí fuera la escomedura vieya de ela rede,

el filván nel que queda la povisa, el pasu muertu

percorriendo’l cai.

 

La escomedura vieya, lo que queda.

El calambrión desfechu ente los dientes,

la llingua muerta, el gatuñu bebiendo na firida,

la rede, la fuxida constante y testerona,

los pies detrás.

 

Qué nun daríes, corazón, pa remontar la pena

y ser otra vuelta cascarera onde tornaran

de báramu les gaviluetes;

qué pa que’l lloru adulces se volviera pacetible

desmayu onde’l sol, eternu, se posara.

 

Lourdes Álvarez (Urbiés, 1961) tien espublizaos tres llibros: Aldabes del olvidu (1990), Mares d’añil (1992) y Son del Tardíu (2006), amás de les antoloxíes Poesía escoyida (1985-1997) y Mediando les distancies (2006)

Read Full Post »

Llugar, de Lourdes Álvarez

 

Raspiando’l cielu,

reposaba con nós l’atardecerín.

Sobre lo llano, la tentación

de llevantar ellí les tiendes nuestres,

na rasa al sol de primavera,

promesa de pa siempre.

Pa enxamás nun volver;

beber de la lluz esplandeciente

y dexar qu’españara’l so raigón nos pies curtíos.

Nun desandar les llombes,

nun triar los caminos pindios al pobláu,

desvistir el semblante del dolcu milenariu de la sombra

pa enxamás nun volver,

pa zarrar los sentíos a la enferma alcordanza

y ser el vientu cimble.

 

Trotiando, llegaron los caballos,

llimpia la clina de memoria y de nuedos,

namás la sede gobernando’l so instintu.

Llegar al manantial, a lo visiego.

Onde broten les fuentes.

 

Siguieron el camín,

descendieron les carbes,

galope polvorientu a la reguera,

a lo cabero’l valle.

 

Tres la esplandeciente lluz vieno la nueche,

el sabor de lo ariao marcó nos llabios

hasta calar el suañu y resfregar los güeyos

de fontana perdida.

 

Dexemos la esplanada, dimos la vuelta;

entendimos de sópitu la razón esencial

pa escoyer el llugar

onde plantar los fíos y poner sementera.

Lourdes Álvarez (Urbiés, 1961) tien espublizaos tres llibros: Aldabes del olvidu (1990), Mares d’añil (1992) y Son del Tardíu (2006), amás de les antoloxíes Poesía escoyida (1985-1997) y Mediando les distancies (2006)

Read Full Post »

Pa sabese, de Lourdes Álvarez

 

Prendió la lluz pa sabese un poco viva;

espurrió’l brazu y dexó andar per él,

en filera, a les formigues.

Como un árbol –pensó- pa ser árbol

en flor y primavera,

pa enraigonar como un carbayu vieyu,

como una castañal –quixo depués-

onde pose’l cuquiellu

o una llamera que suerba la seronda

y ser ocre.

                    Depués perdió’l color,

vio cómo-y s’arrepegaba

al dolcu de la niebla y más tarde al iviernu;

foi la nieve mesmo coronando’l cumal,

el xelu que resiste no visiego

de carreteres curves na metada la nueche

hasta ser nueche. Al cabu

tenía que pasar y apagó la lluz.

 

Lourdes Álvarez (Urbiés, 1961) tien espublizaos tres llibros: Aldabes del olvidu (1990), Mares d’añil (1992), y Son del tardíu (2006), amás de les antoloxíes Poesía escoyida (1985-1997) y Mediando les distancies (2006)

 

Read Full Post »

Cuando nun quiera ser, de Lourdes Álvarez

  

Cuando dolor me vuelva,

cuando sangre, cuando yá enxamás vea

retayu azul na nueche y me consuma.

Depués, cuando la risa

seya agrín nos mios llabios

y nun quiera ser nunca.

Cuando nun quiera ver

y seya la tristura tolos nomes que tuvi

y namás quiera en ti

cuando llegues y anueves perfiles na ventana

y seyan los postigos la manera d’adiós;

cuando venga cordal y otra vez nos besemos,

cuando vuelva ser flor que se nos torna encesa;

ehí, cuando l’aniciu

-cuando seya na nueche cantaderos de mayu,

los seres que quiximos

pa nun ser más abril-

volveré de ser madre,

sable nes cordeleres por si me vuelvo amor,

agua nos llabios.

Cuando seya muyer,

nueche na nueche en que lleguemos

y otra vez miyo abierto pa que grane’l mio ser

y m’abrigue en casa la señaldá,

cuando vuelva’l dolor,

cuando sienta que tuvi –primer vez-

les mios manes calando la consciencia

d’amor del que nun niego,

cuando llore quiero –por dios-

namás tener mirada y señes del recuerdu,

corazón bien presente que m’avieno a la calma

y me devuelve’l tueru,

sangre y ser, señal de lo que tuvi:

la casa de los padres.

 

Lourdes Álvarez (Urbiés, 1961) tien espublizaos tres llibros: Aldabes del olvidu (1990), Mares d’añil (1992) y Mediando les distancies (2006), amás de l’antoloxía Poesía escoyida (1985-1997).

Read Full Post »