Feeds:
Entradas
Comentarios

Archive for the ‘Héctor Blanco’ Category

 

Buscar dientro’l pechu y nun atopar

más que niebla y silenciu, tiempu y nada.

Querer llorar y nun poder, estériles

los mios güeyos. Abrilos pa volver

al color gris de la tarde gastada,

los inútiles trastos de la vida

dormíos baxo’l polvu desprendío

de cada día que nun foi feliz.

Llegar al fondu final d’otru día

col cansanciu como una yedra negra

corrompiendo l’alma y rogar

que tean abiertes les puertes del sueñu.

 

Héctor Blanco (Uviéu, 1979) tien un llibru espublizáu: Nortiando (2005)

Anuncios

Read Full Post »

 

¡Adiós estación!

diz el neñu nel asientu d’atrás,

la cara pegada al cristal

mientres el tren echa a andar.

Y yo entrúgome por qué nun puedo

despidime del to amor con esa allegría,

con esa mesma esperanza

nun futuru ensin dulda meyor, más feliz, más brillante,

por que saber qu’esti cielu que contemplo

ye’l mesmu cielu que ta contemplándote a ti

nesti momentu

fai que’l mio corazón pese demasiao y me caiga a los pies,

onde s’alcuentra cola mio alma y llueu rueden pel suelu

hasta’l fondu del vagón.

 

La to voz al otru llau del teléfono sonaba enfastiada

mientres discutíemos les últimes coses,

repartíemos los restos del naufraxu.

La mio vida ye como cuando de neñu subes a un árbol mui altu

y quedes ellí, quietu y abrazáu con fuercia a un troncu

demasiao delgáu que, azotáu pol aire, se mueve

demasiao.

 

Héctor Blanco (Uviéu, 1979) tien un llibru espublizáu: Nortiando (2005)

Read Full Post »