Feeds:
Entradas
Comentarios

Archive for the ‘Esther Prieto’ Category

 

Entá nun sabes de mio más que los llabios

y la risa que pongo nos minutos cimeros de l’angustia.

Entá. Y tu duermes mientres too pasa, y nada queda de min,

y yo soi otra.

Nun tengo yá dioses, nin llibros que m’abeyen,

nin aquellos semeyos de cuando nenes

que tantes vegaes nos fixeron rir cola risa los tontos.

Nun tengo yá nesti día más que’l besu que me deas.

 

Esther Prieto (Arenas de Cabrales, 1960) ties espublizaos dos llibros de poemes: Edá de la memoria (1992) y La mala suerte (2000).

Read Full Post »

 

Madre vértigu, madre espantu que m’ocupes,

acueyi a esta to fía desolada y ciega, falta de cimientos,

güerfana de dioses y esperances.

Madre povisa, madre desaniciu que me paristi nel ermu del mundu habitáu,

bendiz a esta to fía, perdida y silente,

triste como dengún ente los tristes.

Fía soi de l’abondosa tristeza del to vientre abultáu,

-acaso nun me reconozas- y de la sombra margurienta d’una casualidá mayor que’l mundu;

ésta soi yo, la to fía, crecida como ríu,

como sede na garganta, que grita y torna p’haza ti’l so rostru.

 

Esther Prieto (Arenas de Cabrales, 1960) ties espublizaos dos llibros de poemes: Edá de la memoria (1992) y La mala suerte (2000).

Read Full Post »

 

Agora, nena que fuisti cuantayá,

adolescente de mañanes blanques

y otra vez,

nena na ciudá,

trémente les manes del aire,

el tiempu por venir

y abúltate la vida otra vuelta

cadena erma de pareyes y relós,

suañu metálicu y de coche

cruzando rápido la cai y la to casa.

Agora, que yá nun yes a cuntar

colos deos la edá de la memoria,

dices namái tardes de plata,

esti escozor d’home estremecíu

y la historia qu’has d’interpretar.

A la to edá,

abriesti yá les puertes al dolor;

el tiempu, igual que los recuerdos,

foi prendiendo en ti,

y lo mesmo que los cuentos, foi la risa

arena de los llares espardío pela tierra.

 

Esther Prieto (Arenas de Cabrales, 1960) ties espublizaos dos llibros de poemes: Edá de la memoria (1992) y La mala suerte (2000).

Read Full Post »

 

 

Pesllada la puerta, echaos el cuarterón y los

postigos dexé la casa, por si un día vuelvo.

Caltengo nel envés de la memoria caminos

y caleyes de champán y d’escuela: imprecisa

cartografía del vencíu.

De la casa del padre salí travesando

los más altos puertos de piedra, y salté sebes

y esguilé árboles de frutes duces y amargues.

De la casa del padre llegué hasta esti día

como zrezu xaponés que nada guarda

y mira pal suelu, de revés, plasmáu y sordu.

 

 

 

Esther Prieto (Arenas de Cabrales, 1960) tien espublizaos dos llibros de poemes: Edá de la memoria (1992) y La mala suerte (2000).

 

 

Read Full Post »