Feeds:
Entradas
Comentarios

Archive for the ‘Chechu García’ Category

 

Trabayen na escombrera

manos

de muyer.

Miren a la cámara

enllenes de Norte y fame.

Son carboneres.

Pantasmes d’un mundu

que nun-yos pertenez.

Escures sombres

nuna tierra estraño.

 

Perdíes,

ensin campanes

qu’esconxuren

el nuberu y la derrota.

 

Chechu García (L’Entregu, 1970) tien espublizaos dos llibros: Les coraes de la roca (1999) a comuña con Martín López Vega, y Teseles (2003).

Read Full Post »

 

El vieyu héroe

sienta nuna roca xunto al mar.

El cielu, coloráu,

ye’l cielu de bronce de los poemes d’Homeru.

La sable rellumante, la de milenta versos.

 

Les manes que mandaron nel timón d’arguyoses proes

apigacen cansines nel cayáu.

Son pelleya de güesu, los brazos de fierro

que ficieran cantar cimblante l’arcu.

 

Nes playes d’Ítaca,

los güeyos que nunca erraren blancu

nortien l’horizonte sedientos de señaldá.

 

Pente les nubes que texen

y destexen l’alcordanza,

los dulces llabios de Circe

vencen al tiempu.

 

Chechu García (L’Entregu, 1970) tien espublizaos dos llibros: Les coraes de la roca (1999) a comuña con Martín López Vega, y Teseles (2003).

Read Full Post »

 

Solitariu

enzarráu nun cuerpu d’espacios

posa’l chopu de tantes tardes.

 

Parez eternu

coronáu pol sol de primavera.

En paz. Ayenu al mundu.

Completu.

 

Y ensin embargu

na picolina

amústien-y les primeres fueyes

arrástrense los gritos

día y nueche, ensin parar.

 

Qué xabaz llucha de silencios.

Con calma infinito

la yedra va envolviendo-y el troncu.

Afogándolu.

Con invisible enfotu

van los arfueyos

envenenando-y la semiente.

 

Qué mansu dolor.

 

Tamién el tiempu

na increíble inmovilidá

de la tarde,

ta consumiendo

al vieyu chopu.

 

Chechu García (L’Entregu, 1970) tien espublizaos dos llibros: Les coraes de la roca (1999) a comuña con Martín López Vega, y Teseles (2003).

Read Full Post »