Feeds:
Entradas
Comentarios

Archive for the ‘Marta Mori’ Category

 

Dacuando dame por pensar

nos díes que pasaron

y al poco de vivilos

yá nun soi quien a recordar.

Esos díes qu’albidraba perdíos

o que yo mesma quixi que finaran

pa nun siguir sintiendo.

Díes d’agobiu y mancadura,

de trabayu nos güertos del olvidu

y llabios ensuchos de deséu.

Unos díes que,

cuando menos lo camientes,

aporten de sutrucu a la memoria

y t’acuten con una seguranza.

Y ye entós

cuando yá nun cuenten nada,

cuando por fin los sientes como tuyos,

cuando por fin conoces nellos

el tastiu del to sangre

y el soplu del aliendu que t’anima.

 

Marta Mori (Xixón, 1965) tien espublizaos dos poemarios: Pórticu (2003) y El tiempu de la espera (2005).

Anuncios

Read Full Post »

 

Del país onde yo vivo,

nun fala naide.

Naide s’ocupa

del pasu sele

que marquen sobre él les estaciones,

nin de cómo l’iviernu

aporta de sutrucu

y s’espurre cásique hasta xunu,

húmedu y cruel.

Naide nun toma cuenta d’eso.

 

Como tampoco falen de la llerza

qu’en dellos díes de borrina

escluca dende dientro de los güeyos,

nin del calter atlánticu y ambiguu

que nos fai amar l’agua y la grisura,

anque siempre digamos lo contrario.

Naide nun diz nunca nada d’ello.

 

Naide que pinte

el milagro d’oru la nozal

nes mañanes serondes de noviembre.

 

Naide que grabe

el quexíu pantasmal del cuquiellu,

que namás les mimoses de febrero

son a esconxurar.

 

Nadie pa cuntar

el crecimiento ansiosu de les sebes,

l’esbarrumbe esmeralda de les fontes,

l’esnalar sele

y ausente

de la muerte

penriba d’unes cases

de les que naide nunca dixo nada,

y apenes queda nada pa dicir.

 

Marta Mori (Xixón, 1965) tien espublizaos dos poemarios: Pórticu (2003) y El tiempu de la espera (2005).

Read Full Post »

 

Cinco son los sustantivos que más quiero:

árbol, cuerpu, mar, desiertu y cielu.

De cuando en vez tengo sentío

un apreciu intensu y braeru

por sustantivos como

paciencia o llibertá;

en tou casu,

los sustantivos más guapos

nun son los que más quiero.

Ente los axetivos,

préstenme claru, fuerte,

pacetible y azul.

Nun son sonoros como

líticu o sátrapa,

pero valen pa casi toles coses

que paga la pena conocer.

Ente los verbos, en fin,

quédome con vivir;

nun ye nin gota orixinal

pero conxuga con too:

al fin y al cabu,

mientres que van trescurriendo los alverbios,

ye lo que nos queda por facer.

 

 

 

 

Marta Mori (Xixón, 1965) tien espublizaos dos poemarios: Pórticu (2003) y El tiempu de la espera (2005).

 

Read Full Post »