Feeds:
Entradas
Comentarios

Archive for the ‘Xosé Bolado’ Category

 

Ríu abaxo van

los díes aquellos d’espacios abiertos

ya horizontes en bona compañía,

pero acueye la tarde serena

que’l tiempu seya del Ovidiu

ya aporte mansu, pacetible

ya nos dea en pensar un ocasu

de rapaz que vuelve a casa

enredándonos col pasu de la xente,

mentanto’l cielu abocana

ya l’aire se duerme.

 

Ríu abaxo la memoria

nuna saca de gatinos ciegos

que mano débil posare

naquel Nalón de sobrevivencies.

Yera la ufierta primitiva,

l’otru cabu d’esti filu

qu’agora siente na tierra lloñe

l’esnalón frescu de les fueyes

la música antigua de to casa.

 

Xosé Bolado (Uviéu, 1946) tien espublizaos dos llibros: Conxura contra la decadencia (2002) y Na estación de los relevos (2007).

Anuncios

Read Full Post »

 

Foi pena que quixeres buscar la vida,

tan tarde, nun país inclináu al ocasu,

pero solo’l to intentu de garrar densidá,

d’asomate al verbu sin complicidaes,

dióme’l xuiciu pa ver a esti árbol queríu,

que crez cabu  casa, colos güeyos d’un viaxeru

que, de pasu, contemplare’l so volumen,

la so color mortecina,

anque-y surdan al pie les primaveres,

o n’intentos vanos llamiare la pical

na tarde confusa de l’iviernu.

 

Sabes, que namás, pueo date la mano,

acaso, pensar,

contigo, en cómo la vida va pesando sola:

esa manera que tien el tiempu perdíu

de volvenos mansos en dos palabres,

 

mientres cabruñe’l sol el filu de les hores

ya l’aire solanu entorne la canciella…

basta’l vuelu en dos palabres,

perdebaxo la tierra.

 

Xosé Bolado (Uviéu, 1946) amás de dellos llibros en castellán, tien espublizaos dos llibros: Conxura contra la decadencia (2002) y Na estación de los relevos (2007).

Read Full Post »