Feeds:
Entradas
Comentarios

Archive for the ‘Aurelio González Ovies’ Category

 

Tolos díes son iguales. Llevántase

y enxagua los güeyos y la cara. Toma

un sorbu café. Saca les pites,

pon la pota a ferver, sacude les alfombres

y barre l’antoxana.

Tolos díes igual.

Mete unos bocaos porque hai que resistir.

Va mirar los viveros, el morgazu;

arranca cuatro berces,

quita la ropa seco. Siéntase a repásalo.

 

Tolos díes lo mesmo. Escurez,

bate un güevu. La tortiya francesa,

el parte. La soledá y el calavichu de la

contraventana.

 

Tolos díes. Unu

                             a unu.

 

Una manera más

d’entrampiar la esperanza.

 

Aurelio González Ovies (Bañugues, 1964) tien espublizaos dellos llibros en castellán y tamién 34 poemes (a imaxe del silenciu) (2003)

Anuncios

Read Full Post »

 

Alcuéntroles dacuando

Güei yá naide les paña…

Güei yá naide les paña…

 

Y entovía me güel a pólvora

y a branu y paezme

mentira

que s’esfumaren estos 40 años (que

s’esfumaron. La vida namás cunde

cuando se nos ablaya):

 

Taben toles fachaes encalaes

y fresques

y golía la carne guisando nes cocines

y en tolos corredores

la lleche recudiendo nes fardeles

de sábana.

 

Prestábanos –qué ilusiones más rases

                                    y más fondes-

mirar cómo plantaben les estaques

d’ocalitu

pal quioscu de la música

y el puestu la barraca;

y esperar los camiones colos fierros

del tiru y de la tómbola

y a aquelles portugueses de faldones floriaos

y pendientes de cobre

que diben a la presa de mio güelu

a llavar los cacharros y garrar agua.

 

Prestábanos, si, muncho

nos prestaba

que llegaren los primos,

que llenaren la casa,

la comida’l domingu, nel medio’l

tendeyón, aquella mesa llarga…

 

Alcuéntrolos dacuando

y entovía’l nordeste –el mesmu

que m’empuxa, el mesmu que m’avieya,

el mesmu que m’arrastra- traime cachos

d’aquellos paxarinos que vais

cantando y d’aquella moza con cara xitana.

 

Y entovía nos altos maizales

que m’aparten de mi, que separen

pasáu d’esta edá sin sustancia,

adiéntrense pareyes de recuerdos

d’amor;

                y una verbena allumbra

ente’l mio  corazón y una inmensa

distancia,

con guah.inos que compren

a les ablaneres

unes gafes de plásticu, carraques,

restallones y manzanes

cubiertes de colorao y escarcha.

 

Varines de volador…, la vida ye

lo mesmo: enciéndese,

espovisa, revienta,

y dexa

             un filu

                         de fumu

qu’ensiguida rescampla.

 

 

Aurelio González Ovies (Bañugues, 1964) tien espublizaos dellos llibros en castellán y tamién 34 poemes (a imaxe del silenciu) (2003)

Read Full Post »

 

Nun volveré a nacer. Naide

lo fizo. Pero por si los muertos

anden ente nosotros

coles señes cambiaes y unos vistios

nuevos y el so corazón propiu,

 

PIDO

ser esti mesmu yo nel que viví,

con toles mios maníes,

con tolos mios defeutos.

Díxilo munches veces

y otra vez lo repito:

quiero nacer ellí,

                       onde ronca’l Cantábricu

contra’l cuerpu oxidáu

del mio Llumeres, un puertu, mui

al norte, con galipote y mofu

y botes y lancheros.

Escuchar los glayíos

d’unes muyeres buenes llamando

                             -dende la nueche alta-

a los sos homes,

porque ta la mar mala

y mal iviernu.

 

Que la mio imaxe primera seya la to caruca,

madre mía, y los mios deos te toquen,

dende yá mui de neñu,

como’l que posa un poco de brisa

nuna flor,

como’l que tien mieu mancar la piel

d’algo tan tierno.

 

Ellí mesmo, nuna casina baxa con balcones

azules,

a la vera’l camín, ente’l

faru

y el cielu. Al norte, muncho

al norte,

                       -casi en plenu abandonu-

onde toles mañanes sonaba una sirena

porque morría un mineru.

Que los mios hermaninos quieran

ser pa siempre los míos;

y un domingu mio pá

nos amarre un columpiu nes

cañes más gordes del peréu.

 

Que tean nel so sitiu les coses que me falten

y que fueron,

los güeyos qu’aprendí,

qu’un día nun abrieron

               les sos contraventanes,

nin podaron los árboles,

nin tendieron la ropa,

nin salieron xamás al panaderu.

 

Ellí, tien que me ser ellí, xusto

onde sentí tantu fríu per fuera, tantes

ganes de tanto,

como cariñu dientro. Al norte, muncho

al norte, ente maízos fondos

y horros altaneros, baxo los qu’entovía

dalgunos díes, mui ceo,

oigo cómo cabluña’l filu a les gadañes

el martiellu del tiempu.

 

Por eso, cuando me toque dir,

pa que nun se nos faiga abegosu’l realcuentru,

que me metan puñaos de salmoria na voz

y, nos remos del alma,

que m’añuden to nome, madre mía,

en llugar de cruciame les manes

sobre’l pechu.

 

 

Aurelio González Ovies (Bañugues, 1964) tien espublizaos dellos llibros en castellán y tamién 34 poemes (a imaxe del silenciu) (2003)

Read Full Post »

 

Cuanto espero del mundu, téngolo yá nes manos.

De la fe, les veletes de xelu sol cielu azul de xunu.

Del amor, el primer fogonazu y la certera bala.

De la nueche, la estrella cola que mio ma llee

de nueche los mios versos.

 

Del silenciu, los güeyos.

 

Del iviernu, los páxaros.

 

 

 

Aurelio González Ovies (Bañugues, 1964) tien espublizaos dellos llibros en castellán y tamién 34 poemes (a imaxe del silenciu) (2003).

 

Read Full Post »