Feeds:
Entradas
Comentarios

Archive for the ‘Xose Manuel Valdés Costales’ Category

 

Hay demasiada primavera en el aire…

J. E. Pacheco

 

Comu palombes lloques

                                              van les ñubes

acarriando la nuechi.

Aereu ye’l ruxir d’esta marea

que s’allonga d’abril a l’alcordanza.

 

Abonda primavera hai nel aire,

demasiáu de pelligru tres de la lluna enllena

que comu un incensariu

esparde los arumes

y fura a los furacos de les hores escures.

 

¿Ónde guardar la sangre hasta qu’aparen

eses venes que cuerren tiempu abaxu?,

¿ónde dexar a salvu la mirada

d’esti verdor que guaña

comu una llingua dulce na memoria?

 

Nun volties la cabeza: demasiaes

estatues tienen yá dellos xardines.

Abástete’l rellumu

que ye l’ecu

de les aguyes con que bordaa nomes

sobre la muerte, güei, la primavera.

 

Xose Manuel Valdés Costales (Quintueles, 1948) tien espublizáu namás un llibru: Memoria encesa (1989).

Read Full Post »

 

Has facelo dacuandu. Emborráchate güei

y llevanta ensin mieu, oscenamente,

el párpagu mariellu que los años

entornaron enriba’l to paisaxe.

Bebi otru tragu entá, si nun t’atreves

a dexar la to casa…

                                     Tan los árboles

despesllando’l caxón de los arumes,

el fumu va marcando la páxina que l’aire

acaba de voltiar. Too ta intauto

comu entós, tovía hai mores

roxes comu’l tizón de la seronda

y fueyes de castañu

pa coronar la tiesta d’una neña

de verde orfebrería

y la tribu xabaz

qu’adivinasti siempres al otru llau la cárcoba

quiciabis quedrá güei declarate la guerra.

 

Anque munchos pisaren esi prau, nun t’importe:

entovía ye tuyu. Ensin sabelo naide,

sali de casa y veti,

dempués de tantos años,

a facer posesión del to dominiu.

 

Xose Manuel Valdés Costales (Quintueles, 1948) tien espublizáu namás un llibru: Memoria encesa (1989).

Read Full Post »