Feeds:
Entradas
Comentarios

 

Los güeyos de los tuyos tan sabíos,

el to rebañu nun bardial d’un puertu

l’agua’l ríu turbio, l’aguañal muertu,

atrás queden diezmaos y vencíos.

La nueche de llenzos estremecíos

por estrelles, nun mapa del desiertu,

un mar pel medio y un futuru inciertu,

traza llaberintos indefiníos.

¿Qué se siente ensin salida, ensin sienda,

ensin llar nin dirección señalada,

ensin sur, ensin norte que t’entienda?

La vida xabazmente acorralada,

na medrana medra y fai que s’encienda

tola esperanza del que nun tien nada.

 

Miguel Allende (Llaviana, 1960) tien espublizao Pallabres de payaso (2004) y Güelgues de gallón (2008).

 

Na casa vieya, aquella empozada en claridá y xunos, n’arume

empapizón de figales: na vieya

                                                          casa onde s’espeseció la mio neñez.

Aquel cuartu al final d’esi pasiellu cuya estrenchura

                                                                                                 facía cruxir a la

hora la siesta con pisaes d’esiliu, aquel cuartu

                                                                                   nel que naufragaba

peles tardes, cuando primero yera una sollume fresco pero dempués diba calistrando

esa lluz encetao que se vertía como pingarates de lleche nun concu

café puro; y tomaba’l día

                                                 color de merienda murnia. Afuera ferruñaba la reblanea’l

coche de Miguel, mediu soveráu ente ortigues, criando sobre la so

chapa verde

                        una costria de sol sarnosu. La goliosa mansedume del

llavaderu. La yedra caltrizando

                                                           la paré de la cuadra. A la vera, nun

tendeyonucu d’uralites, aquel ecu amargu qu’apodrecía

                                                                                                      en vacíes

garrafes de gasoil tremaes pela clarixa estartalao. Aquel tendeyonucu

d’uralites nes que fervía’l cielu

                                                           devastando les tardes.

 

Héctor Pérez Iglesias (Llanera, 1978), amás d’un llibru en castellán, tien espublizao Prisión de náufragu (2005) y L’amarga cazumbre (2008).

  

Como nun teño máquina quitanieves,

retiro a paladas a tristeza

antias d’abrir a porta.

Despós descolgo del roupeiro

el disfraz d’ayer,

el de mañá.

Enmazcaro a mía voz, os meus andares,

déixome dentro

y salo da mía casa.

 

María José Fraga (El Franco, 1964) tien espublizáu un llibru: Terra de Pataricos (2007).

 

 

Lonxe queda a miña casa,

a única que sinto como miña: aquela

dunde deron sentido ó meu nome

cando se repartía o pan na mesa

y o labor pró día.

 

Aurora García Rivas (Santiso d’Abres, 1948.) tien espublizaos dos llibros: O viaxeiro da noite (2004) y Trinquilintainas (2008.).

 

Podría dicir mentires,

escribo,

sé cómo se fai.

 

Podría dicir que cada vez

que digo “tu” nun falo de ti,

falo d’otra,

anterior o postrera,

eso nun da más.

Si digo que m’enredé

na guedeya escura d’una muyer

que tenía’l pelo curtio y roxo,

podría facelo

de mou que me creyereis.

 

Si esplico cómo te follaba

indiferente

cada vez que te facía l’amor

cola mayor delicadeza,

incluso tu duldaríes.

 

Y agora, sicasí, equí,

enfrente del otru home,

el del espeyu,

cuento too esto y él conoz

ensiguida

que miento.

 

 

Rubén d’Areñes (Areñes, 1983), tien espublizáu’l llibru Los venticinco pasos (2008).

 

 

 

Echáu toi debaxo una figal

nel xardín de mio casa

al par de la fuente que nun cuerre

porque nun-y funciona’l cañu.

 

Dame’l suañu y pienso

que les lletres d’estos versos

daquién yá les escribiera:

 

daquién como yo sabía

canciones de Bob Dylan de memoria

o de Miranda.

 

Y dame qué pensar

que yá la yerba que metí ayer

na tenada, taba metío.

 

Y qu’esti malvís qu’agora canta

nesa mata nuna castañal

yá cantara

 

enantes qu’escribiere esti poema.

Pinga’l cañu de la fuente.

Pingo, pingo.

 

Toi equí debaxo la figal

y cualquier día

tengo d’iguar esi grifu.

 

Miguel Allende (Llaviana, 1960) tien espublizao Pallabres de payaso (2004) y Güelgues de gallón (2008).

 

A ti préstente tolos homes

–y dicen

que tamién delles moces con posibles aspirantes a top model-

y esti desesperu por tastiar el paladar del mundu

ye otru intentu d’enllenar d’imáxenes la vida.

Dalguna vez vi, tuvi tamién, un llugar afayadizu siguiendo

el pastu llargu que quemó l’orín ácidu de los que lo traguen. Warning.

A ti préstente tolos homes y yo nun soi menos qu’otru, alcuérdate,

pero yo almito la responsabilidá pa colos de la mio clase;

nun t’enseñaré les llorces onde s’exilia’l sebu

-les tetes fofes que tamién guardo-

y xiringaré nel mar tres veces la pirula

pa ufiertame poderosu baxo l’astru d’arena. Y asina

escitate a ti

 

y a tolos homes.

 

Sergio Gutierrez Camblor (Lieres, 1985) tien espublizao’l llibru A dixo a B: “perversu” (2007).

 

La térmica

enfrente

de casa,

cuando entá

nun tiraba

l’aire de mudanza

yera a los güeyos

d’aquel neñu que fui

un trasantlánticu

                                empielgáu na tierra,

un monstruu prehistóricu

dando les boquiaes per aquella

chimeneona pela que salía un vafu

espantible

la térmica

duraba tol valle, too lo inundaba

col so runfir amburante, la boca

llaceriosa del infiernu, el volcán

que fabricaba

                          díes de nublina.

 

“Mírala, que pronto la van trancar”,

dicía mio pá

dende la ventana

como humanu que yera

fechu pal erru. Mírala

dempués de tantu cambiu

                                             y aire

de mudanza, dempués

de volar los montes y los caminos

arrodiada per una tierra

de nates y d’islán

como una pirámide, como un Dios

totémicu resiste

l’esbarrumbe de los castilletes

y de les fortaleces industriales

amburando l’aire col so runfíu

tolos tiempos

                          necesiten de símbolos

y equí queda’l resclaviu

del infiernu que fuimos

y que sedremos:

 

esta ye la entrada

al nuestru tiempu, al nuestru infiernu.

 

Pablo Rodríguez Medina (L’entregu, 1978), tien espublizaos cuatro llibros: Nel dialectu del grisú (1999), Tiempu d’esiliu y povisa ayeno (2001), Los desconocedores del agua (2002) y El color de l’ausencia (2004).

 

Nada malo vien

cola lluz manso y pacetible

del branu:

los páxaros,

como arrepentíos,

los playeros de tela del economatu,

que tamién llegaben en bandaes,

según me diz a la oreya’l neñu que soi

y que recuerda.

Cazar cabezones en calesquier charcu onde bebiera’l ganáu.

Vagar, munchu vagar…

Eses otres enseñances

les que nun pidíemos

y veníen tamién, callandino,

buscándomos.

 

Colesti cola lluz manso y pacetible

del branu,

tres de pasar los caberos díes

xugando colos neños de 1936,

-teníes doce años-

dando saltiquinos nun cascayu que desapaez,

cuando saltes pa dar la vuelta,

ente la lluz manso y pacetible,

y puta embustera del branu.

 

Rubén d’Areñes (Areñes, 1983), tien espublizáu’l llibru Los venticinco pasos (2008).

 

El mio corazón, que nun vió

enxamás una ñube colorada

nel cielu de les isles Lofoten,

nin el débil sol ivernal nel puertu d’Oslo,

una mañana de xineru –con esa lluz

comu de semeya retocada-,

nin entansiquiera a la muyer que pasiara un díi cincu,

de cualesquier mes pel mercáu de flores de Bergen;

que nun sintió nunca

les plumes de les que faló Herodoto

que l’aire llanza constante

a la cara del viaxeru,

nin el color azul de la ñeve nuna nueche d’iviernu,

con ñeve fasta les rodíes, lloñe de cualesquier compañía,

coles neñes dilataes pol frío;

que nun sabe lo que ye una tormenta nel Geirangerfjord,

nin anduvo nunca la carretera ente Narvik y Kiruna,

nin ascuchó enxamás la música del órgano de la catedral de Fredrikstad;

que nun recibió nunca una d’aquelles cartes

que moces anónimes escribíen a los marineros

que seguían navegando naide sabe a ónde, porque nunca nun tornaron;

el mio corazón,

que nun viera nenguna d’eses coses

y nun entiende nin una pallabra d’esti canciu

va invadiéndolu la señaldá,

el marmuriu d’un esiliu antiguu, les ganes de colar a cualesquier llugar

que nun seya esta habitación sola, nin estes pallabres gastaes.

 

Martín López Vega (Po, 1975), amás de dellos llibros en castellán, tien espublizaos cuatro llibros: Esiliu (1998), a comuña con Chechu García Les coraes de la roca (1999), La visita (2000) y Piedra filosofal (2002)