Feeds:
Entradas
Comentarios

Archive for the ‘Pablo X. Suarez’ Category

 

Yo nun llevé la fame

nin espardí’l virus del país de los negrinos.

Nun baltié los árboles de la selva virxe venezolana

nin violé a les moces de gordu panderu

nin conduxi’l tanque qu’arrampló col pueblu

nel que vivíen.

 

Tampoco calqué’l botón pa que cayeren les bombes:

namás el númberu cinco del mandu a distancia.

 

El sistema punxo un sofá ente’l suelu y el mio gordu panderu

y la tele y yo somos funtivos mínimos

nesti requexu últimu de la estructura.

Sintagmas nominales, ensin vierbu.

Dos nomes y unos cuantos semes indeterminaos

en relación de concordancia.

 

El sistema débeme una chocolatina

débeme definitivamente información

acerca del Real Madrid

o les fiestes de cumpleaños pa perros qu’organicen en Corea

na so vieya pretensión de ser

significativamente relevante.

Toi llibre de causa: nun soi vierbu.

Siacasu

suxetu pasivu d’una oración pronunciada por otru.

 

O interxección: soi un ¡meeeeca!

 

Y yo nun maté a Antonio Udina Burbur, l’últimu falante de dálmata.

Namás los llocos falen solos.

 

Nun pinto nada nesta frase.

 

Pablo X. Suarez (Samartín d’Anes, 1981) tien espublizáu’l llibru Asturiana Beat (2005)

Read Full Post »

 

Nes nueches d’avientu, mientres la xelada

manga sábanes blanques nes llunes de los coches

la xente busca’l calor de les cafeteríes de pueblu

y sentao al rodiu de ceniceros de propaganda de Mahou

diserta de la vida de los otros.

Los fechos y decires

d’un mundu de persones conocíes

van como representándose nes serviyetes de papel

que salen adulces de los colloraos servilleteros de propaganda de Mahou.

Les llingües humedecen el papel finu de les serviyetes

col que se mazca la desgracia, y tamién

la boca como ratu caliente de les botelles de Mahou

ye conductu pel que se sumen otros amores, pasaos y presentes.

Dacuando marca un gol el Real Madrid

y les tiestes de los homes orbiten contra l’arcu de la tele

onde otros subnormales lo celebren.

Delles veces ye la paisana o la moza qu’entra aterecida la que gravita

nes palabres del coru griegu que calez la Mahou.

Cuando falen de mi, mientres la xelada

fai encoyese arriba nos teyaos a los gurriones

tamién hai un oriciu flotando nel interior de cada botella de Mahou

y cada aguya del oriciu ye un cachu de la mio carne.

Depués, solos o en pareya, caún camina en direición a la so casa

ordenadamente, onde, nel sofá

contempla les histories de médicos, abogaos o policíes de les series.

Les cafeteríes solitaries

colos sos carteles pseudoartísticos de Mahou colingando a la entrada

queden entós desiertes como les calles de pueblu que les arrodien.

Dientro, na pantalla, pasaron a publicidá los babayos de Telecinco

y ponen un anunciu de Mahou nel que bailen

la danza d’una traxedia les moces medio en porriques

mientres la xente, los d’enfrente, cola suya cotidiana a recostines

piensa no que comprar o en dir a echase, non mui tarde

pa siguir bien al otru día, nuevamente

como camaleón vueltu al color del güevu o vientre maternu

al par que’l xelu va diliendo, l’espectáculu.

 

 

 

Pablo X. Suarez (Samartín d’Anes, 1981) tien espublizáu’l llibru Asturiana Beat (2005)

Read Full Post »