Feeds:
Entradas
Comentarios

Archive for the ‘Ignaciu Llope’ Category

 

¡Hai ánxeles cayíos ellí onde tu mires!

Fernando Pessoa

 

I

Tien la casa l’aire quieto

cuando la soledá inmensa d’agostu

abre los díes como si foren

les manes asustaes d’un neñu.

 

Y cuando a les coses conocíes

s’allegue estraña la derrota

esa hora erma darámi la certeza

del run de la mar venciendo

l’arena estranxero de la to cintura.

 

II

Sé que vienes de llugares que nun conozo

ellí onde les tardes son altes y pacetibles

onde los homes llevanten mansos la mirada

per sobre la lentitú de les coses.

Ellí, onde una lluz fatigada vien d’anunciar

la fin de los díes de gloria.

 

Y yo que nun fui quien

a pósate nos güeyos el páxaru

cansáu de la mio mirada

nun sabré yá d’esi territoriu qu’habita

nel fondu temible de la to ausencia.

 

Ignaciu Llope (Cuideiru, 1962) tien espublizaos tres llibros: Xeografía del agua (1992), El llugar del sol (1999) y Una casa tendida al océano (2003).

Anuncios

Read Full Post »

 

L’home mira pela ventana

cómo la ciudá vei diliéndose na nueche

nuna armonía repetida

 

y mira un rigu puercu

que nesti iviernu yá tardíu

dexa baxo les pontes

cachos de xelu gris.

 

Una vieya y escrita

metáfora de la vida,

piensa,

como l’augua fendiendo la tierra

o una metáfora de la revolución

como l’augua enchendo

siempre’l mesmu rigu.

 

Ye una ventana

d’un cuartu d’hotel

-Hotel Lux, Avenida Tuerskaia-

inhóspita, desarmada

como tolos cuartos d’hotel

d’una Europa rota

onde se repiten homes convocando

les pallabres ingrientes de la revuelta.

 

Y pela ventana

l’home ve una tabierna del Vendrell

travesada pel aire del monte

travesada peles voces de los compañeros

cuando nes meses esperen pan y vino

y ayena al mundu

una rapaza regala la so risa

ayena tamién a les banderes

qu’abandonen les Places de Moscú

y pasen pela Avenida Tuerskaia

baxo la ventana pela qu’un home

mira l’aire llimpio del Vendrell

más alló de les augües puerques

del rigu Moskva.

  

Ignaciu Llope (Cuideiru, 1962) tien espublizaos tres llibros: Xeografía del agua (1992), El llugar del sol (1999) y Una casa tendida al océano (2003).

 

Read Full Post »

 

Vese una casa sola

al final de la carretera

y una playa abriéndose

na llinia alba de la sablera.

 

Un home solu ve venir

dende l’estragal de la casa

el cansu pasu de los convictos

ente la herba alta de los praos.

 

Dicen qu’al final de la ciudá

nacen carreteres que van

al otru llau del mundu

a llugares

onde homes derrotaos

paguen dalguna delda abangándose

ente la herba alto de los praos

al ritmu d’órdenes que tayen el silenciu

col aceru opacu de la fuercia.

 

Y una playa muerre na sablera

y hai un home solu

descifrando la bóveda del cielu

cuando nos cantiles s’anuncia

llonxana la galerna.

 

Ignaciu Llope (Cuideiru, 1962) tien espublizaos tres llibros: Xeografía del agua (1992), El llugar del sol (1999) y Una casa tendida al océano (2003).

 

Read Full Post »