Feeds:
Entradas
Comentarios

Archive for the ‘Xandru Fernández’ Category

 

Perdona que te diga

que nun creo na vieyera.

Tampoco nun creo –yá non- na mocedá.

Yá fui vieyu munches veces, tamién mozu,

y tovía toi a tiempu de ser dambes coses

media docena de veces d’equí a que me toque

morrer. Fui vieyu de bien nuevu,

con xeitos y con xestos amustiaos,

y fui mozu munchos años depués,

cuando tocaba maurecer y darréu

podrecer: ye’l ritmu de la fruta,

non el míu: lo mío ye esnidiar pela costera

d’una montaña rusa neuroquímica

y avieyar y anovar hasta que quiera

 

l’enfisema, la suerte o l’aneurisma.

 

Xandru Fernández (Turón, 1970) tien espublizaos cuatro llibros: Primer bestiariu (1990), Breviariu de la diáspora (1993), Lletra muerto (1998.) y Servidume (2001).

Anuncios

Read Full Post »

 

Llamámoslos, y yá nun respuenden.

Amigos, nomes del pasáu, de la tierra

que dexemos al marchar.

Nomes que suaño, aquellos en qu’inda creo,

que pronuncio delles nueches, esta nueche, por

exemplu, n’aceptando

que ye la vida mesma la que vien de revelase

na so ausencia.

 

Lo qu’esos nomes dicin, lo que falen,

lo qu’adulces revelen: que falten, los amigos,

esta nueche d’esnales amplies, amplísimes,

tan amplies qu’anubren hasta l’alcordanza.

Lo que nellos escucho: les cadenes del fríu

abasándose lentes, xuxuriando: nun escuches,

ellos falen d’un delitu, d’una falta,

pero nun quieren dicite qué delitu, qué falta,

cómo foi que col pasu del iviernu

ellos mesmos, tan fríos, ordenaron esi

lentu precer de los recuerdos.

 

Alpenes los sos nomes. Ellos,

los qu’acasu quedaron, nun los pueblen

nunca más colos rostros d’alcuando.

 

Xandru Fernández (Turón, 1970) tien espublizaos cuatro llibros: Primer bestiariu (1990), Breviariu de la diáspora (1993), Lletra muerto (1998.) y Servidume (2001).

Read Full Post »

 

Yera vieyu’l país, y vieya la casa,

y la xente y el cielu: vieyos

los caminos de la infancia, les pallabres

escrites enantes del regresu:

vieyes les manes que volvieron

al saludu tres de tanta despidida.

Yera vieya la tierra, pero ella

yá lo yera enantes que marchares.

 

Xandru Fernández (Turón, 1970) tien espublizaos cuatro llibros: Primer bestiariu (1990), Breviariu de la diáspora (1993), Lletra muerto (1998.) y Servidume (2001).

Read Full Post »

 

La yerba, frío y llento como la mano del dios, púnxome l’alba nos párpagos.

Buscábame como la piel d’un amante qu’en recuerdos convierte too aquello que toca.

Buscábame como sólo la guerra busca a los que duermen baxo’l vientre de ñube d’una paz suañada, como sólo la lluz busca a los ciegos que suañen la color de la tarde.

Traíame la mar y el cantar d’una bígara xunto al mio oyíu, esperecíu ecu d’una ciudá fundida nel Atlánticu.

Traíame’l mugor y l’ardicia d’un pueblu qu’abasaba tonelaes de roca muerto y tiempu fósil baxo les estrelles.

Nella l’amor y la fe sólo pallabres, más nada que soníos dulces pero estranxeros, luxos importaos d’ultramar, patayes copies de sentires reservaos a los dioses.

Uquiera que’l mirar fuera sangre, ellí los corazones alendando los deseyos de nueso, les fiebres posibles, positives, les caricies qu’alpenes se sienten en morriendo l’abrazu.

En tiempos d’inmortales, la edá yera otra, otru’l metal de les rises, otra la simetría de los llabios, otra mar

y otru mirar s’añudaben nes arestes del aire, y un marmullu de suaños secos al poner pie na tierra de siempres.

Vistíase de branu la solombra de los que pasaben saludando a los durmientes, y el claru tremor d’aquellos qu’amiyaben camín de casa dexaba un tastu agriu na verde mansedume de les siendes.

Había una fonte y un riscar d’esnales na vecindá del miel.

 

Xandru Fernández (Turón, 1970) tien espublizaos cuatro llibros: Primer bestiariu (1990), Breviariu de la diáspora (1993), Lletra muerto (1998.) y Servidume (2001).

Read Full Post »