Feeds:
Entradas
Comentarios

Archive for the ‘Taresa Lorences’ Category

 

Falaréi de la infancia ya d’un ríu

que corría monte abaxo hasta perdese

na l.l.ende de las tierras de los xaldos.

 

Un ríu qu’estremaba pueblos, acoyía nomes,

L’Ueyu Verde, Remoleiru, L.l.eirosu,

cuando cruciaba l.l.ibre las alturas.

Un ríu demorándose en bañales de piedra,

barcos pa las nubes ya espeyos

pa los güeyos profundos de las vacas.

 

Falaréi de muyeres embrocadas sobre l’augua,

de tardes de xabón ya cucharapas,

de la espuma delío, de palabras

que marchanon pa siempres ríu abaxu.

D’un mundu blancu boca arriba,

afitáu en corras de trapu na cabeza.

 

Falaréi d’un ríu que corría

arrastrando la tierra hasta perdese

nos escuros dominios de la sombra.

 

Taresa Lorences (Cueva, Salas, 1955) tien espublizaos dos llibros de poemes: El son de los picaportes (1994) y Sobre l’arena (2003)

Anuncios

Read Full Post »

 

Nun me queda nada. El futuru

ya un desiertu de sal nel horizonte

ya ese home arrechu que camina

siguiendo’l mandáu d’un estranxeru.

Ardéu la casa, la infancia, el barru

guarda las formas de los rostros

ya las manos alzadas a los dioses

pidiendo de baldre misericordia.

 

Obedecer: un vezu, una consigna

anubrir los caminos

onde transita la memoria.

Irresponsables me condenan

los corazones, tienen el color

ablancazáu de la ceniza, la blandura

dulzaya del corondiu.

Acarreto a las espaldas el l.l.antu

de los nenos, l.l.evo comigo

las palabras de los muertos,

pregúntome nesta hora

si entá nun enfriaron las xacedas,

¿cómo nun volver la vista atrás?

 

Taresa Lorences (Cueva, Salas, 1955) tien espublizáos dos llibros de poemes: El son de los picaportes (1994) y Sobre l’arena (2003).

Read Full Post »

 

Cuando pienso tierra escribo azul,

cielos navegables, torres de piedra

qu’apuntan hacia’l norte.

Suaños verdes d’alcacer, pan

abrasándose nas eras.

 

Cuando digo presente veo bocas

coronadas d’espinas,

homes que persiguen paraísos de pesiglás,

corazones que bombian millones por minutu,

miedu. Miedu que berra en bidones d’aceite.

Días ensarriaos, nueites blancas,

ya un didu que borra la hestoria de los l.l.ibros.

 

El pasáu ya un cristal qu’escacha

nos güeyos d’una nena de tres anos

perdida

nel sagráu camín d’Idarga.

 

Taresa Lorences (Cueva, Salas, 1955) tien espublizaos dos llibros de poemes: El son de los picaportes (1994) y Sobre l’arena (2003).

Read Full Post »

Amo de las tierras

la parte alta ya las nubes

buscando cielos intanxibles.

Amo esa l.l.uz purísima del branu,

d’ande nacen las sombras.

Febreiru licuándose en mofu

nos caminos. La nieve

qu’adormez las siendas.

De los homes, l’esfoutu

en volver a construyilas,

de los caballos,

la quelina al vientu.

 

Taresa Lorences (Cueva, Salas, 1955) tien espublizáos dos llibros de poemes: El son de los picaportes (1994) y Sobre l’arena (2003).

 

 

 

 

Read Full Post »