Feeds:
Entradas
Comentarios

Archive for the ‘Ana Vanessa Gutierrez’ Category

 

Cuando yera una guah.a

tenía mieu a les solombres de los árboles:

víales tan grandes

que creyía que me tragaben.

 

Depués,

entamó a atérrame la inmensa escuridá:

diba pela neñez

marchando a tientes

y tarreciendo cayer.

 

Na mocedá

amedrentábenme los silencios

y tolo que desconocía:

asina que trabata siempre de saber más.

 

Agora,

un poco menos xoven,

yá sólo me dan mieu les palabres.

 

 

Ana Vanessa Gutierrez (Urbiés, 1980), tien espublizaos dos llibros: Onde seca l’augua (2003) y La danza de la yedra (2004).

Read Full Post »

 

Escuéndime de los suaños escuros.

De les manes sangrientes

que dibuxen el mio nome nes parés.

 

Tápame de los milenta cristales

nos que se desfaen los mios güeyos

cada vez que sobrevivo.

 

Guárdame del tiempu del odiu

y de la tierra d’olvidu

na que van desterrame.

 

De tolo que nun merezo

de lo que nun deseo,

porque prometo que soi inocente,

anque tea poseída pol páxaru verde del mal.

 

Ye cierto qu’abro les manes

y nacen el fueu y les espines.

Que la mio llingua españa en llamaes

cada vez que me nombro.

Que soi’l diañu y la muerte

y que toi famienta de les tos intenciones.

Pero suplícote llealtá y entrega

porque sé que tu nun vas negame.

 

La otra voz que naz en min

(la que fuxe y se rebela)

quier alvertite a pesar de too:

 

Cuerri. Escuéndite tu.

Guárdate del mio amor

y de les mios traiciones.

 

Ana Vanessa Gutierrez (Urbiés, 1980), tien espublizaos dos llibros: Onde seca l’agua (2003) y La danza de la yedra (2004).

Read Full Post »

 

A J. R. F.

 

Presiéntote entrando a tientes…

y como nun quiero asústate,

ciarro los güeyos y finxo siguir dormida,

mentes escucho la to respiración forciada…

 

Voi aldovinando’l percorríu de les tos manes,

de la que retires les sábanes

que me cubren de misterio y de vergoña.

 

Ya cásique controlo’l xirpíu

que provoquen les tos piernes allugándose a les míes.

 

Ye custión de tientos y d’años…

 

Como si fora un gatu,

fáigome con cuidáu a los tos espacios,

y calístriome del fogaxe qu’esborda la to piel

y que-y falta a la mía.

 

Entovía queden respingos ente nós…

Eso nos salva de la quema.

 

Ana Vanessa Gutierrez (Urbiés, 1980), tien espublizaos dos llibros: Onde seca l’agua (2003) y La danza de la yedra (2004).

 

Read Full Post »

 

 

Sentíte falar con señaldá

de la tierra que nun tienes,

de la neñez perdida.

 

Yo, llonxana,

como siempre,

nun acertaba a falar:

pensaba que, si la patria ye un temblor,

tu yes munches,

                                munches veces,

patria mía.

 

 

 

Ana Vanessa Gutierrez (Urbiés, 1980), tien espublizaos dos llibros: Onde seca l’agua (2003) y La danza de la yedra (2004).

 

Read Full Post »