Feeds:
Entradas
Comentarios

Archive for the ‘Milio Rodriguez Cueto’ Category

 

Muerte

más fuerte

que les llingües

 

Muerte

más fuerte

que los pueblos

 

Muerte

más fuerte

que les cases

 

Muerte

más fuerte

que mio padre

 

Muerte

más fuerte

que l’amor

 

Muerte

más fuerte

qu’estos versos.

 

Milio Rodríguez Cueto (Xixón, 1962) tien espublizau el llibru Flores de cementeriu (2000)

Read Full Post »

 

Apetez, davezo, ser Nils Nolgerson, montar un páxaru perriba’l país,

sentir el coru contentu de los bosques anudaos a la tierra

acolumbrar les berizales xabaces, estraes de violentos espíritus prelatinos

posase ente hortensies na mariña.

Les plantes son la patria.

 

Pero somos Kaspar Hauser,

y aprendemos a falar pa despidinos.

 

Milio Rodríguez Cueto (Xixón, 1962) tien espublizau el llibru Flores de cementeriu (2000)

Read Full Post »

 

Un airón purificador vien barriendo la Historia.

Vien a polos manso, vien a polos míos.

Gachamos la cabeza, abrimos los brazos, como un Cristu derrotáu, a la Muerte vencedora.

Vivíemos felices, y el final nun nos asusta.

A los verdes caminos vuelven tovía, tranquiles,

                                                                                les pantasmes,

a les pumaraes d’entós, con aquelles mazanes fresques brillantes na mano.

Pero nós, ¿pa quién pantasmes?

El mundu faise escuetu y angulosu, nun queda sitiu pa la caña del fresnu,

y un airón barre la Historia llevando la foyarasca inútil.

 

L’airón que nos busca sabe los caminos.

Va entrar en cada casa y llimpia-y el Tiempu

va correr peles fríes víes del tren mineru peles qu’anduvimos de neños, escapando de la ñeve

va raspiar la enorme mano obrera del padre, que nos guardaba l’equilibriu, y tamién la va llevar

va adelantásenos corriente arriba, hasta la casa los güelos y d’un soplíu va apagalos, col carbón de la cocina

va llevar cada palabra dicha en corredor, cada palabra dicha en solhorru.

La vara de midir del Tiempu tolo apequeñeció:

el camín d’infancia, la mano paterna, la ñeve…

Y en corredor punxo sombres, y en solhorru ruines,

y nel país miedren namás ya les metáfores,

flores de cementeriu.

 

Milio Rodríguez Cueto (Xixón, 1962) tien espublizau’l llibru Flores de cementeriu (2000).

Read Full Post »