Feeds:
Entradas
Comentarios

Archive for the ‘Felipe Prieto’ Category

 

Miraime: yo ero un home

que nun tien más amor qu’una bombilla.

Nun tengo más qu’eso.

 

Ero yo quien jeciu aquella casa,

l’estragal de piedres bien rodaes,

quien dexó a gurbiazos carne y tiempu

per aqueles tallaes engolaes

al sen del aire más cimeru.

 

Yo, yo lu jeci a ganes,

pa ser feliz cola muyer que quise.

La que quísome a mí más que yo a ela.

 

Pero güei nun tengo más amor qu’una bombilla

(la mio muyer morrió, jue con Dios

pal otru mundiu, si é que lu hai,

que tengo les mios dudes;

y los jiyos marchárense, juérense toos como páxaros del ñeru).

 

Y güei estó equí, solu como un llobu,

por eso, cuando salgo, prendo la lluz de la bombilla

pa vela de lloñe, borrachu pela nuechi

cuando güelvo a cas, igual que denantes,

cuando ela mi esperaba.

 

Felipe Prieto (Zamora, 1941), tien espublizáu’l llibru Esbilla (1980).

Read Full Post »