Feeds:
Entradas
Comentarios

Archive for the ‘Nené Losada Rico’ Category

 

Muévome na poesía

como cuyarina nuna charca d’augua.

La charca mía ya una fueya de papel

onde las palabras,

sin costa-ys trabayu,

esgolan lo mesmo que gusarapos

enantes de la metamorfosis.

L.lueu, como la rana,

ando a saltos

l.leendo lo qu’acabo d’escribir

ya alcuentro palabras que faltan

ya outras muitas que sobran.

¡Cuánto meyor me sentía

siendo gusarapu

sin más pretensiones

qu’esnidiar pola charca

de la fueya de papel

cola l.libertá

del qu’inda nun ya nada,

pero que s’alcuentra a gustu

siendo lo que ya…

ya faciendo lo que fai.

 

Nené Losada Rico (L.l.uarca, 1921) tien espublizaos tres llibros: Cantares valdesanos (1992), Entre apigarzos (1997) y El nome de las cousas (2001), amás de l’antoloxía Fueyas que reverdecen (2004)

Anuncios

Read Full Post »

 

Durmo col sueñu despiertu

como apigarzando.

Escurez aína na miou ventana,

pero empuxa l’amanecida;

quier entrar la l.luz,

peme que nun podrá sin ayuda,

pero’l miou sueñu,

inda despiertu,

nun tien priesa,

siéntese a gustu.

Pola rendixa de la ventana

cólase’l fumu de la l.luz;

a non tardar el fueu,

el de la gran l.luminaria

que calez el día;

tendréi que deixalu entrar,

tien priesa.

A la nueite,

col sueñu despiertu,

volveréi soñar

entre apigarzos.

 

Nené Losada Rico (L.l.uarca, 1921) tien espublizaos tres llibros: Cantares valdesanos (1992), Entre apigarzos (1997) y El nome de las cousas (2001), amás de l’antoloxía Fueyas que reverdecen (2004)

Read Full Post »

 

Aquel carreiru

yara lo mesmo que los outros;

feitu d’idas ya venidas

con alparagatas ou madreñas.

 

Pero pa miou tía

yara distintu…

porque alguien, un día,

lo encarrilara por el.l.a.

 

Nastoncias yara clandestinu,

comu l’amor,

ya inda güei sigue siéndolo

nel recuerdu.

 

Mientras tantu desaparez

poucu a poucu, entre matos,

sin que nadie

lo eche de menos.

 

Nené Losada Rico (L.l.uarca, 1921) tien espublizaos tres llibros: Cantares valdesanos (1992), Entre apigarzos (1997) y El nome de las cousas (2001), amás de l’antoloxía Fueyas que reverdecen (2004)

Read Full Post »