Feeds:
Entradas
Comentarios

Archive for the ‘Pablo Rodríguez Medina’ Category

 

La térmica

enfrente

de casa,

cuando entá

nun tiraba

l’aire de mudanza

yera a los güeyos

d’aquel neñu que fui

un trasantlánticu

                                empielgáu na tierra,

un monstruu prehistóricu

dando les boquiaes per aquella

chimeneona pela que salía un vafu

espantible

la térmica

duraba tol valle, too lo inundaba

col so runfir amburante, la boca

llaceriosa del infiernu, el volcán

que fabricaba

                          díes de nublina.

 

“Mírala, que pronto la van trancar”,

dicía mio pá

dende la ventana

como humanu que yera

fechu pal erru. Mírala

dempués de tantu cambiu

                                             y aire

de mudanza, dempués

de volar los montes y los caminos

arrodiada per una tierra

de nates y d’islán

como una pirámide, como un Dios

totémicu resiste

l’esbarrumbe de los castilletes

y de les fortaleces industriales

amburando l’aire col so runfíu

tolos tiempos

                          necesiten de símbolos

y equí queda’l resclaviu

del infiernu que fuimos

y que sedremos:

 

esta ye la entrada

al nuestru tiempu, al nuestru infiernu.

 

Pablo Rodríguez Medina (L’entregu, 1978), tien espublizaos cuatro llibros: Nel dialectu del grisú (1999), Tiempu d’esiliu y povisa ayeno (2001), Los desconocedores del agua (2002) y El color de l’ausencia (2004).

Read Full Post »

 

Una vegada al mes el reconcomiu

aporta a esta tierra que va tiempu

nun ara naide, onde xorrez la uz

restorcío como un quebrantu. Una

vegada al mes l’amorecer

de les estaciones anubríen

el pipiar del malvís y la zarrica

qu’añera nel corazón engafáu

de muyer sola. Y mentres llores

la solez y los díes repetíos

faen de la vida la propia trampa.

Arrefundes los dientes de la rabia

que naide nun suerbe como si fore

suya.

¿Pa qué entós el dolor

de fema en baldre y traicionada?

Una vegada más el reconcomiu

aporta

a esta tierra de la que solo cuenta

ente soledá y nada

la edá de los caminos.

 

Pablo Rodríguez Medina (L’entregu, 1978), tien espublizaos cuatro llibros: Nel dialectu del grisú (1999), Tiempu d’esiliu y povisa ayeno (2001), Los desconocedores del agua (2002) y El color de l’ausencia (2004).

Read Full Post »

 

Como la cirigüeña

la to saliva zarra

mancadures d’otru tiempu, argayos

qu’esfarrapló l’amor

d’aquel tiempu

                             vencíu

 

tantes y tantes veces

 

enquivoqué’l rumbu de les caricies

y di la voz y el fuelgu

a quin nun-y correspondía

namás que l’escaezu y la derrota.

 

Vengo cola piel abrasao

derrompíu de silenciu, el versu

ye namás lo que me salva

mentres besu a besu se zarren

estes mancadures que son namás

les puertes del recuerdu

                                             les del cuartu

zarraránse tamién

y quedaremos solos

ensin nenguna memoria

sacantes nosotros.

 

Pablo Rodríguez Medina (L’entregu, 1978), tien espublizaos cuatro llibros: Nel dialectu del grisú (1999), Tiempu d’esiliu y povisa ayeno (2001), Los desconocedores del agua (2002) y El color de l’ausencia (2004).

Read Full Post »

 

Quixere sentite de tarde

en tarde

                como entós, tres de bañamos

desnudos nun saltu del ríu

onde les cañes peñeraben

la lluz d’aquelles hores

de ponese al verde y ver de cerca

la priesa por dexar atrás

el ser neños y algamar

el gociu del presente

vivir, de la presente

alcordanza del vinu y d’unos llabios

atarazaos de mansedume

 

como les cirueles qu’a la vuelta

casa díbemos pañar.

 

Mas esti ye’l tiempu, y nel engañu

podrecen les cirules que guardemos,

y l’arume dulzón que tien la muerte

 

ye del pobre na desgracia

l’aliviu les sos penes.

 

Ye’l momentu de preguntase

cuándo volveré a tener malapenes

quince

              los años d’entós

cuando esistir yera útil

en cualquier oriella

y a cualquier hora

 

cuando’l mundu s’aconceyaba

de cutiu na nuesa boca

ente la fruta reciente y la vida

 

y ensin sabelo.

 

Pablo Rodríguez Medina (L’entregu, 1978), tien espublizaos cinco llibros: Nel dialectu del grisú (1999), Tiempu d’esiliu y povisa ayeno (2001), Los desconocedores del agua (2002), El color de l’ausencia (2004), y Aires de mudanza (2008).

Read Full Post »