Feeds:
Entradas
Comentarios

Archive for the ‘Martín López Vega’ Category

 

El mio corazón, que nun vió

enxamás una ñube colorada

nel cielu de les isles Lofoten,

nin el débil sol ivernal nel puertu d’Oslo,

una mañana de xineru –con esa lluz

comu de semeya retocada-,

nin entansiquiera a la muyer que pasiara un díi cincu,

de cualesquier mes pel mercáu de flores de Bergen;

que nun sintió nunca

les plumes de les que faló Herodoto

que l’aire llanza constante

a la cara del viaxeru,

nin el color azul de la ñeve nuna nueche d’iviernu,

con ñeve fasta les rodíes, lloñe de cualesquier compañía,

coles neñes dilataes pol frío;

que nun sabe lo que ye una tormenta nel Geirangerfjord,

nin anduvo nunca la carretera ente Narvik y Kiruna,

nin ascuchó enxamás la música del órgano de la catedral de Fredrikstad;

que nun recibió nunca una d’aquelles cartes

que moces anónimes escribíen a los marineros

que seguían navegando naide sabe a ónde, porque nunca nun tornaron;

el mio corazón,

que nun viera nenguna d’eses coses

y nun entiende nin una pallabra d’esti canciu

va invadiéndolu la señaldá,

el marmuriu d’un esiliu antiguu, les ganes de colar a cualesquier llugar

que nun seya esta habitación sola, nin estes pallabres gastaes.

 

Martín López Vega (Po, 1975), amás de dellos llibros en castellán, tien espublizaos cuatro llibros: Esiliu (1998), a comuña con Chechu García Les coraes de la roca (1999), La visita (2000) y Piedra filosofal (2002)

Anuncios

Read Full Post »

 

 

O sol é grande, caem co’a calma as aves…

Sá de Miranda

 

Calienta con inesperáu aliendu’l sol

esta mañana d’avientu; la xente

despóxase de la ropa d’abrigu cola que saliera de casa

inadvertida, ensin saber d’esti imprevistu regalu.

Y cómo s’agradez; el café puede tomase

afuera, baxo los soportales

mentes lleo nun periódicu estranxeru

que ñeva na tierra de los míos;

y sustituye la lluz inesperada

per un momentu la lluz de la mirada

d’ella, qu’hasta la nueche

nun volverá de Coimbra. Pero de sópitu

entama a llover.

Y vuelve cola lluvia’l pensamiento

non del suañu llivianu de la muerte,

pero sí de cuidaos graves.

Oh coses, toes vanes, toes cambiantes,

¿qué vanu corazón confía en vosotres?

Pasa’l tiempu –miráilu, ehí va-, pasen los díes

inciertos muncho más qu’al vientu naves…

Yo yá viera equí solombres, viera flores,

viera agua y lluz, l’amor qu’impregnaba les coses

y l’insípidu bebedizu del escaecimientu…

Too cambia, pa eso nun hai cura.

Igual que la lluz cola, volverá la lluz.

Namás que nós nunca nun volveremos.

 

Martín López Vega (Po, 1975), amás de dellos llibros en castellán, tien espublizaos cuatro llibros: Esiliu (1998), a comuña con Chechu García Les coraes de la roca (1999), La visita (2000) y Piedra filosofal (2002).

Read Full Post »

 

A Silvia Ugidos

 

 Esti ye’l llugar al que vengo cuando marcháis toos.

Un cuartu enllenu de fotografíes, de vasos vacíos que bebió’l tiempu.

Peles nueches camino descalzu pela casa sola

con mieu a despertavos: toos dormís n’algún cuartu

y nun atopo la puerta, y quiciabes nun quiera:

quién sabe si sedréis inda los mesmos. Pero siento les vueses voces.

Decís: Vuelve, bésame otra vegada, y temo que too seya un suañu.

Y cada nueche camino otra vuelta descalzu pelos pasiellos a escures.

Alcuentro dacuando coses vuestres pela casa. Pistes segures. Ye lo mesmo.

De tolos caminos del tiempu namás podemos recorrer dos,

y los dos son el mesmu: el que lleva dica’l silenciu final

y el que nos devuelve a cada entrín del pasáu. Siento voces.

Dalgún día. Tarde na nueche. Rescátanos.

Nun puedo fiame de vosotros. Sois xente que yá nun esiste

y que poco a poco va esborrándose.

 

 

Martín López Vega (Po, 1975), amás de dellos llibros en castellán, tien espublizaos cuatro llibros: Esiliu (1998), a comuña con Chechu García Les coraes de la roca (1999), La visita (2000) y Piedra filosofal (2002).

Read Full Post »

 

Xinga’l vientu la plaza vacía,

llévase los restos de la fiesta,

de los branos, de la vida.

Una muyer pasa silenciosa

con tol pesu del iviernu

sobre los hombros.

Nun falo de soledaes,

nin de tardes nes que l’alcordanza

envicia l’aire. Non.

Falo namás del iviernu.

De la lluvia. De la so infinita tristura

D’homes que dende guah.es

yá nun fueron felices.

 

Martín López Vega (Po, 1975), amás de dellos llibros en castellán, tien espublizaos cuatro llibros: Esiliu (1998), a comuña con Chechu García Les coraes de la roca (1999), La visita (2000) y Piedra filosofal (2002).

Read Full Post »