Feeds:
Entradas
Comentarios

Archive for the ‘Xabiero Cayarga’ Category

 

Una ciudá habitable ye una ciudá

onde los árboles llevanten al menos

tanto como les cases. Sélo agora

que llueve y la ventana abierta

al fríu del norte y al aire qu’azota

rabaseres d’agua contra’l vidriu

mez la voz que canta’l Silete venti

col xiblíu intermitente de la fueya.

Los pingos del agua ruempen chiscando

la terraza, nel cantu la memoria

la formosa cantata italiana de Händel

arrástrame agües abaxo,

dica Nápoles, membrando L’amante

del volcán de Susan Sontag. “La pasión

por coleccionar ye una triba

de solicitú compulsiva –escribe-, un donxuanismu

de les coses”. ¿Qué colecciona Lord Hamilton?

Amor, poder, arte, volcanes: belleza.

Y nós, ¿en qué invertiríamos los ruinos aforros

de la vida? Nunos díes de lluz xunto al ríu

o la mar, nel cálidu abrazu de los qu’amamos,

na melodía qu’acompasa la voz de los amigos,

nun llugar onde poder ser al que llamar casa.

Amar daqué daveres significa desear morrer

por ello, o vivir qu’a la fin ye lo mesmo.

Tolos díes vamos a la guerra, lluchamos

con uñes y dientes por defender lo que nos pertenez.

Una ventana pela qu’esclucar. Esta brezna d’esperanza.

 

Xabiero Cayarga (Cangues d’Onís, 1967) tien espublizaos tres llibros: El deliriu d’esclavu (2000), Pequeña Europa (2001) y Les Llingües de la Hidra (2006).

Anuncios

Read Full Post »

 

Sientes a esperar que daquién apaeza na solera

de cualisquier casa, atisbes les sebes que fortifiquen la intimidá

cotidiana y llenden una vida ganada con esfuerzu.

Nel azul braniego los páxaros tracen círculos felices y perfectos.

Pasa un coche per ende, tu permaneces

na cai valera como la rama desnuda d’un árbol, cuando

a la fin asoma un home cargáu de bolses amiyes los güeyos

y observes les punteres vergoñoses de los tos zapatos. Too

sucede como nun suañu que vives, un aire breve y fríu

reafírmate: pudo ser un suañu pero ye la to vida. Elli nun ye’l to

padre, sicasí reconoces el pesu qu’atristaya los sos brazos

con un aire de familia, baxo la indolente indiferencia de los salgueros

el verde trema como sutrumío nun fervor momentaniu.

Pregúntaste si ye la tierra escuro, el so fondu llatíu lo que te llama

y non esti requexu perdíu d’un país llonxanu que recueye to memoria.

Abandones el bancu, da igual, naide vendrá a sacate de ti mesmu.

Abismáu de toa patria descubres la dimensión esacta del to esiliu.

 

Xabiero Cayarga (Cangues d’Onís, 1967) tien espublizaos tres llibros: El deliriu d’esclavu (2000), Pequeña Europa (2001) y Les Llingües de la Hidra (2006).

Read Full Post »

 

Nun puedo volver a dormir contigo

dícesmi nun sms concisu

y directu como un tiru de gracia.

Llámote y nun contestes. Escríboti

un sms onde confieso la mio perplexidá

y la señaldá entá tibia de la to mexella

que suañaba ayeri sobre’l mio pechu. Silenciu

respuendes, silenciu repite l’españíu

d’un disparu de ñeve na ciudá.

Mañana ceo marches nun tren

a Suiza, lleves un llibru que conozo, contigo

lo que vida-y da a la vida: Esi temblor qu’agora

alloñándose m’acadiga. Ye de madrugada

cuando na calle alzo les solapes

del abrigu y afatio la bufanda.

Los dientes de la ñeve muerden la piel vulnerable

del cielu, íntimu corazón de mio que resquiebra.

¡Ah, ser a olvidar! Anubrir la to esistencia,

cada imaxe de ti: infructuosa xera.

¡Ah, l’amor, Hidra espantible y inevitable!

¿Ónde tarás agora que la nueche

ye una llumaral más rabiosa que la del fueu,

una llamada insistente que fura los oyíos?

¿Ónde tas tu? Yá non amada mía. Olvidada de min,

abrazada sombra fuxitiva. ¿Ónde?

Tu, el mio Zahir, la mio desdicha.

 

Xabiero Cayarga (Cangues d’Onís, 1967) tien espublizaos tres llibros: El deliriu d’esclavu (2000), Pequeña Europa (2001) y Les Llingües de la Hidra (2006).

Read Full Post »