Feeds:
Entradas
Comentarios

Archive for the ‘Miguel Rojo’ Category

 

Paecía vivir permanentemente nuna esquina de la cai Corrida. Caminaba a blincos, la mano estendida como si llevare dalgo ente los deos –aire, agua… qué se yo líquido-y tuviera mieu perdelo naquel trote infantil: “Una ayuda” dicía mientres t’espiaba.

Una tarde decatéme –quién sabe los díes, los meses díos- que d’aquellos güeyos sólo les cuenques llindando con esactitú xeométrica la calavera quedaben, pozos negros lo que fueren ventanos.

Otra tarde noté –quién sabe los díes, los meses díos- que na esquina de la cai Corrida faltaba algo, que yá nun taba la cafiante necesidá d’esquivar aquel cuerpu bamboliante al remolín de la vida.

Y entós, delantre d’aquella ausencia ensin nome, tuvi’l primer sentimiento dignu de toa esta historia.

 

Miguel Rojo (Zarracín, 1957) tien espublizaos tres llibros: Buscador d’estrel.l.as (1996), Bilbao, estación terminal (2001) y Llaberintos (2005), amás de l’antoloxía Territorios (poesía 1980-2005).

Anuncios

Read Full Post »

 

Nevaba cuando fuimos a enterrate.

 

La nieve cayera alrior de la lmimosal

y sobre la ciudá que, na distancia, paecía pigazar

nel fríu d’aquella primera mañana de marzu.

Desde’l tanatoriu asina se vía, asina lo vía yo

mientres pensaba na deserción definitiva,

na falta definitiva,

nel poema que t’escribiría con aquel primer versu

que tamién sedría l’últimu:

Nevaba cuando fuimos a enterrate.

Ente ellos dos nada,

vacíu irrellenable tan grande

como’l qu’acababa d’abrise a los tos pies

y, de pasu, a los nuesos.

 

Ye verdá qu’enxamás nos entendiemos –anque eso,

supongo, pasa nes meyores families-

y que la to ausencia nun fai menor esa verdá.

Pero ye grande la solombra que la muerte

Estiende alrior de los que te quedamos y, frente al mieu

de sabete tan solu, les manes tan fríes, too s’escaez,

el pasáu y tamién el futuru: solo presente queda,

vela desnortiada pola falta del aire elemental.

 

¿Pa qué dicir más?

¿Pa qué buscar palabres

coles que llenar la fosa abierta

ente esi primer versu y l’últimu,

fáciles palabres d’autocomplacencia familiar,

d’empalagosu amor filial?

Prefiero parame nel silenciu

como dicen que fain los caballos

cuando vienen mancaos

pola pena de sabese inda más solos.

 

Nevaba cuando fuimos a enterrate.

 

Miguel Rojo (Zarracín, 1957) tien espublizaos tres llibros: Buscador d’estrel.l.as (1996), Bilbao, estación terminal (2001) y Llaberintos (2005), amás de l’antoloxía Territorios (poesía 1980-2005).

Read Full Post »

 

Hai una cosa más triste que la casa

Esbarrumbada: l’Home valtiáu.

 

Na llanada d’Aptera hai una casa valtiada (Sieglu I a. C., diz un lletreru)

Les columnes vencíes, una a una,

recuéyense nel centru del patiu

pa dase calor al silenciu de les nueches.

Los pasiellos enceraos pol roce de los díes

tovía son a vese, y la pila onde se llavaron manos

y un pozu ensin roldana, el cuartu y la ventana

que daba pa contra los Montes Blancos

onde tovía se caltién la mesma nieve

como si hobiere la esperanza

de volver a vese vista polos güeyos

qu’equí s’abrieron.

 

Na pica Cimadevilla hai una casa valtiada (Güei mesmo cayó, diz un paisanu)

Dende la cai ye a columbrase la cocina

y los cuartos empapelaos

colo qu’alguna vez debieron ser flores

y xarrones verdes. Hai una cama vacía

y la escalera que nun conduz a nada

porque lleva al cielu.

L’armariu esportilláu rincha col aire

saláu del Nordés mientres mui al fondu,

nun requexín, la taza del wáter

paez esperar l’arrecendor de les ñalgues

qu’equí s’abrieron.

 

Miguel Rojo (Zarracín, 1957) tien espublizaos tres llibros: Buscador d’estrel.l.as (1996), Bilbao, estación terminal (2001) y Llaberintos (2005), amás de l’antoloxía Territorios (poesía 1980-2005).

Read Full Post »