Feeds:
Entradas
Comentarios

Archive for the ‘Xurde Álvarez’ Category

 

Nunca esistió una dómina

tan constante al olvidu.

Nunca un tiempu tan indiferente

a la raíz

y al orixe.

 

Deprendimos rápido l’abandonu. Supimos

zarrar la mirada asumiendo ceo

el despreciu

y el desdexu.

 

Culpamos

a lo nuevo como propósito d’enmienda

     y nel nome

del presente

construyimos

la desmemoria:

 

Teníemos,

teníemos que sobrevivir.

 

quiciabes fue la lluz

lo que nun vimos.

quiciabes traximos el fríu

p’anestesiar la derrota.

 

Abiertu al mundu yo sólo sé

que necesitamos

vacíos, silencios,

sosiegos propensos

a centramos,

porque tenemos perdío tanto,

tanto de lo que verdaderamente

yera nueso;

tanto de lo que mos entregaron,

tanto de lo que nós

nunca nun podremos

entregar,

que nin tan siquiera mos recordamos,

que nin tan siquiera sabemos nomar

toes aquelles coses

qu’un día amamos;

 

tolo qu’anguaño s’escapa,

too aquello que busca

-desesperadamente-

    un trozu de memoria

 

nel qu’esistir.

Mañana,

cuando too acabe,

cuando parte de nós

-ensin querer damos cuenta-

calle y calle;

los pocos, señalaos

como estraños,

los que podría desapaecer

tolo que de nós ye

y aínda siguiríamos

sintiéndote,

guardaremos como prófugos el sentimiento

nuna cárcel

d’esperanza

pa qu’esista a lo menos un trozu dulce de tierra

que lleve’l nome común

 

de Nosotros.

 

Xurde Álvarez (Sama, 1973) tien espublizáu’l llibru La sema (1999)

Anuncios

Read Full Post »