Feeds:
Entradas
Comentarios

Posts Tagged ‘Rubén d’Areñes’

 

Podría dicir mentires,

escribo,

sé cómo se fai.

 

Podría dicir que cada vez

que digo “tu” nun falo de ti,

falo d’otra,

anterior o postrera,

eso nun da más.

Si digo que m’enredé

na guedeya escura d’una muyer

que tenía’l pelo curtio y roxo,

podría facelo

de mou que me creyereis.

 

Si esplico cómo te follaba

indiferente

cada vez que te facía l’amor

cola mayor delicadeza,

incluso tu duldaríes.

 

Y agora, sicasí, equí,

enfrente del otru home,

el del espeyu,

cuento too esto y él conoz

ensiguida

que miento.

 

 

Rubén d’Areñes (Areñes, 1983), tien espublizáu’l llibru Los venticinco pasos (2008).

 

 

Anuncios

Read Full Post »

 

Nada malo vien

cola lluz manso y pacetible

del branu:

los páxaros,

como arrepentíos,

los playeros de tela del economatu,

que tamién llegaben en bandaes,

según me diz a la oreya’l neñu que soi

y que recuerda.

Cazar cabezones en calesquier charcu onde bebiera’l ganáu.

Vagar, munchu vagar…

Eses otres enseñances

les que nun pidíemos

y veníen tamién, callandino,

buscándomos.

 

Colesti cola lluz manso y pacetible

del branu,

tres de pasar los caberos díes

xugando colos neños de 1936,

-teníes doce años-

dando saltiquinos nun cascayu que desapaez,

cuando saltes pa dar la vuelta,

ente la lluz manso y pacetible,

y puta embustera del branu.

 

Rubén d’Areñes (Areñes, 1983), tien espublizáu’l llibru Los venticinco pasos (2008).

Read Full Post »