Feeds:
Entradas
Comentarios

Posts Tagged ‘Pablo Texón’

 

Lo meyor de too yera cuando tovía

yeres quien a llevame

a xocostrines

tu l’héroe l’únicu infalible peles

nueches facíemos un enguedeyu

de piernes na cama, yeren pá, ma, Diego,

yera too tan pequeño

que cabía nuna sábana qué prestoso

que too sea tan pequeño que nun

haya más llendes que’l cantu’l colchón

que nun haya más abellugu que’l to brazu

que les nueches nunca sean llargues

nin fríes nin vacíes

 

lo meyor de

too

yera cuando

too

yera tan cenciello

como trancar la puerta y nun t’afogar

 

tantes coses yeren lo meyor de too

 

Pablo Texón (Felechosa, 1977) tien espublizaos dos llibros de poemes: Toles siendes (2005) y La culpa y la lluz (2008)

Anuncios

Read Full Post »

 

Baxé escontando la cabeza nos hombros de to

cola lluz clisando los güeyos,

to pelo mezclándose colo mio,

y eso fai que tenga más curves

la subida, Córdoba,

llonxana y sola,

les maletes llenes, vacía l’alma,

compartiendo asientu con un

cuerpu non conocíu, materia,

solo materia nuevo.

 

Esti ye’l tren más triste de la Historia de los homes

y nun me consuela sabeme l’únicu culpable.

Tu tamién vas subir sola,

iñando’l dolor, llamentando’l tiempu

perdíu, les tardes tontes de cine y tantos

otros momentos solo xustificables

por ser yo.

 

Atocha ye otru infiernu

non por esperáu menos dolorosu,

esti ye’l tren más triste de la Historia de los homes

y solo hai nueche y veo

que nun llega’l mio país,

que nun acaba de

llegar, porque lu dexé atrás pa siempre

y yá nun hai llar,

nin calor,

nin hores

perdíes

pensando qu’hai un requexín lluminosu

en mundu del que somos los amos.

 

Y yá dixi que nun me consuela

sabeme l’únicu culpable.

 

Tu tamién vas recorrer

Ronda, próxima estación

Bobadilla, próxima estación

Córdoba, próxima estación

Puertollano, próxima estación

Ciudad Real, próxima estación

Madrid Atocha

y vas tar pensando lo mesmo que yo,

pero nin eso mos va unir porque yá

nun hai país nin llar que mos una.

 

Yá se, mante, que voi ser un esiliáu

pa siempre, que m’autoespulsé del paraíso,

perru rabiosu que se muerde,

otru ánxel fieramente humanu víctima

d’esi ser absurdu que mos habita.

 

Sube’l tren hacia la tierra agora desconocío,

agora estraño,

porque quein marchó nun ye

quien vuelve (nunca ye

quien vuelve).

Buscábemos la lluz. Baxemos al sur y

buscábemos la lluz. Y fo la lluz quien

mos topó

abandonaos n’asientos individuales

subiendo hacia l’agua frío y nuevo.

Abandonaos. Tan abandonaos.

 

Pablo Texón (Felechosa, 1977) tien espublizaos dos llibros de poemes: Toles siendes (2005) y La culpa y la lluz (2008)

Read Full Post »

 

Xugábemos a facer películes

na tarde incierta,

a confundir momentos con escenes,

a planificar la midida de la guapura,

a cuantificar el tiempu del dolor.

 

Facíemos películes coles nuestres vides

-sesión continua d’inconsciencia-

pa ser a algamar a onde solo algama

la mano perfecta y fatua de la ficción,

p’asomamos a los precipicios

porque asina lo mandaba’l guionista,

facedor remotu y cruel de la risa.

 

Y aquella orquesta invisible y certera

improvisando febrilmente

una banda sonora.

 

Xugábemos a facer películes

na tarde incierta.

Será por eso que lo recuerdo

too en blanco y negro.

Amor, somos un clásicu del desamor.

 

Pablo Texón (Felechosa, 1977) tien espublizaos dos llibros de poemes: Toles siendes (2005) y La culpa y la lluz (2008.)

Read Full Post »

 

Tien mofu la primer taya que fixi

na faya de Cel.l.ero

PTC ‘82

domingu les calamiyeres teniendo pola

pota d’arroz a lo probe

la mano feble que nun ye a tarazar la corteya

 

xunta la poza tantes veces repasada

LTF ‘67

ocho persones segando n’andecha

un mes d’herba y vinu

la camera enllena pates que nun pregunten

qué ye lo que pasa fuera

 

y cuando tu viniesti

P y C ‘03

camudando los vezos

“esta ye la primer taya que fixi”

 

y tovía hai sitiu pa munches más tayes

toa una estirpe nesti tueru

la buelga vexetad d’una familia equí llabrada

¿quién va valtar primero,

quién va cayer anantes?

 

nadie sabe lo que dura una

f

a

y

a

piérdese na memoria’l momentu en que biltó esta faya

y solo’l que la tira

embaxo

pue saber la so edá

el so tiempu

el día que desapaezamos sabré cuánto llevamos sobre la

tierra

el día que desapaezamos

 

toa una estirpe nesti tueru.

 

Pablo Texón (1977) tien espublizaos dos llibros de poemes: Toles siendes (2005) y La culpa y la lluz (2008).

 

Read Full Post »