Feeds:
Entradas
Comentarios

Posts Tagged ‘Héctor Pérez Iglesias’

 

Na casa vieya, aquella empozada en claridá y xunos, n’arume

empapizón de figales: na vieya

                                                          casa onde s’espeseció la mio neñez.

Aquel cuartu al final d’esi pasiellu cuya estrenchura

                                                                                                 facía cruxir a la

hora la siesta con pisaes d’esiliu, aquel cuartu

                                                                                   nel que naufragaba

peles tardes, cuando primero yera una sollume fresco pero dempués diba calistrando

esa lluz encetao que se vertía como pingarates de lleche nun concu

café puro; y tomaba’l día

                                                 color de merienda murnia. Afuera ferruñaba la reblanea’l

coche de Miguel, mediu soveráu ente ortigues, criando sobre la so

chapa verde

                        una costria de sol sarnosu. La goliosa mansedume del

llavaderu. La yedra caltrizando

                                                           la paré de la cuadra. A la vera, nun

tendeyonucu d’uralites, aquel ecu amargu qu’apodrecía

                                                                                                      en vacíes

garrafes de gasoil tremaes pela clarixa estartalao. Aquel tendeyonucu

d’uralites nes que fervía’l cielu

                                                           devastando les tardes.

 

Héctor Pérez Iglesias (Llanera, 1978), amás d’un llibru en castellán, tien espublizao Prisión de náufragu (2005) y L’amarga cazumbre (2008).

Anuncios

Read Full Post »

 

A los felechos me remito, a los martiellazos

de tobizu que claven fracasu na corteya

de los salgueros. Hubo sílice, habrá

cadabra, pata de cobre, aleación

estrullao escontra’l filu

del alcohol. Cuartu menguante. Cuando aínda

se podría buscar el pulsiu

nes víes del tren. Dello ocle

palpitaba como enromadorios: esguilaba

pela espluma cruxente, esperazábase haza’l sol

enrueñándose nos corcovos de los delfines,

esos rescamplíos azules d’aceru xugoso. Al floriar

per mayu, los raigaños de los mástiles

desordenaben los tesoros somorguiaos. Yera tan hermoso

entós tener alfabetu, a b c dis frutando tanto

tanto

con sólo tanto. Daquella Edá del Fierro

vien esta zuna por mazcar bisagres.

 

Héctor Pérez Iglesias (Llanera, 1978), amás d’un llibru en castellán, tien espublizao Prisión de náufragu (2005) y L’amarga cazumbre (2008).

Read Full Post »

 

 

Aquella nueche’l fríu

yera talo que l’agua de la fonte quedó xelao,

y nello’l reflexu esmaltáu de la Lluna.

Con cuidáu, xixilando que nadie

me viera, foi recortando con una llave l’arniu

de calambriza esplandeciente engarciáu na superficie

escura y escaritona del pilón. Yá nes mios manes

aquella fina llámina de xelu enceso arrellumaba

con una xélida lluz que m’angarabecía

la mirada.

                    Malpenes sentía los deos.

                                                                     Ensin embargu,

nun pude evitar tastiala: al llamber

el so tomu conxelao dexóme la llingua ardiendo,

casimente en carne viva, pero siguí saborgándola,

gastando adulces el so tastu de cristal afilao y vertixinoso

hasta que quedó en cuartu menguante.

 

Héctor Pérez Iglesias (Llanera, 1978), amás d’un llibru en castellán, tien espublizao Prisión de náufragu (2005) y L’amarga cazumbre (2008).

Read Full Post »

 

El fríu llegaba entós puquiñín

a puquiñin, primero esmordigañábanos

los pies al salir de casa como un perru cafiante

qu’intentábamos escabildar

a pataes y pisotones; y mamá yá nos ponía

calcetinos gordos sobre la cómoda. Llueu

yeren los díes d’estrenar gorretu,

cuando esos báramos invisibles

que diben faciendo suya la ciudá añerando

nes esquines espelurciábennos al doblar la cai

col so furiosu esñalíu. Una tarde

perdíamos el tiempu avafando l’aburrición

en finxides bocalades: garrando un llápiz

como un pitu maxinábamosnos fumando

y eso ayudábamos a entrar en calor

y a sentinos mayores. Cuando’l fríu llegaba del too

yá nos escondiéramos d’él ente abrigos, xerséis,

guantes. La bufanda

daba al aire que respirábamos

la tebieza húmedo d’un besu de buenes nueches.

 

Yá nun avisa l’iviernu

cola antelación d’aquellos años. Considera

más que suficientes

los otoños concedíos de ventaxa.

 

Héctor Pérez Iglesias (Llanera, 1978), amás d’un llibru en castellán, tien espublizao Prisión de náufragu (2005) y L’amarga cazumbre (2008).

Read Full Post »