Feeds:
Entradas
Comentarios

 

La térmica

enfrente

de casa,

cuando entá

nun tiraba

l’aire de mudanza

yera a los güeyos

d’aquel neñu que fui

un trasantlánticu

                                empielgáu na tierra,

un monstruu prehistóricu

dando les boquiaes per aquella

chimeneona pela que salía un vafu

espantible

la térmica

duraba tol valle, too lo inundaba

col so runfir amburante, la boca

llaceriosa del infiernu, el volcán

que fabricaba

                          díes de nublina.

 

“Mírala, que pronto la van trancar”,

dicía mio pá

dende la ventana

como humanu que yera

fechu pal erru. Mírala

dempués de tantu cambiu

                                             y aire

de mudanza, dempués

de volar los montes y los caminos

arrodiada per una tierra

de nates y d’islán

como una pirámide, como un Dios

totémicu resiste

l’esbarrumbe de los castilletes

y de les fortaleces industriales

amburando l’aire col so runfíu

tolos tiempos

                          necesiten de símbolos

y equí queda’l resclaviu

del infiernu que fuimos

y que sedremos:

 

esta ye la entrada

al nuestru tiempu, al nuestru infiernu.

 

Pablo Rodríguez Medina (L’entregu, 1978), tien espublizaos cuatro llibros: Nel dialectu del grisú (1999), Tiempu d’esiliu y povisa ayeno (2001), Los desconocedores del agua (2002) y El color de l’ausencia (2004).

 

Nada malo vien

cola lluz manso y pacetible

del branu:

los páxaros,

como arrepentíos,

los playeros de tela del economatu,

que tamién llegaben en bandaes,

según me diz a la oreya’l neñu que soi

y que recuerda.

Cazar cabezones en calesquier charcu onde bebiera’l ganáu.

Vagar, munchu vagar…

Eses otres enseñances

les que nun pidíemos

y veníen tamién, callandino,

buscándomos.

 

Colesti cola lluz manso y pacetible

del branu,

tres de pasar los caberos díes

xugando colos neños de 1936,

-teníes doce años-

dando saltiquinos nun cascayu que desapaez,

cuando saltes pa dar la vuelta,

ente la lluz manso y pacetible,

y puta embustera del branu.

 

Rubén d’Areñes (Areñes, 1983), tien espublizáu’l llibru Los venticinco pasos (2008).

 

El mio corazón, que nun vió

enxamás una ñube colorada

nel cielu de les isles Lofoten,

nin el débil sol ivernal nel puertu d’Oslo,

una mañana de xineru –con esa lluz

comu de semeya retocada-,

nin entansiquiera a la muyer que pasiara un díi cincu,

de cualesquier mes pel mercáu de flores de Bergen;

que nun sintió nunca

les plumes de les que faló Herodoto

que l’aire llanza constante

a la cara del viaxeru,

nin el color azul de la ñeve nuna nueche d’iviernu,

con ñeve fasta les rodíes, lloñe de cualesquier compañía,

coles neñes dilataes pol frío;

que nun sabe lo que ye una tormenta nel Geirangerfjord,

nin anduvo nunca la carretera ente Narvik y Kiruna,

nin ascuchó enxamás la música del órgano de la catedral de Fredrikstad;

que nun recibió nunca una d’aquelles cartes

que moces anónimes escribíen a los marineros

que seguían navegando naide sabe a ónde, porque nunca nun tornaron;

el mio corazón,

que nun viera nenguna d’eses coses

y nun entiende nin una pallabra d’esti canciu

va invadiéndolu la señaldá,

el marmuriu d’un esiliu antiguu, les ganes de colar a cualesquier llugar

que nun seya esta habitación sola, nin estes pallabres gastaes.

 

Martín López Vega (Po, 1975), amás de dellos llibros en castellán, tien espublizaos cuatro llibros: Esiliu (1998), a comuña con Chechu García Les coraes de la roca (1999), La visita (2000) y Piedra filosofal (2002)

 

Se qu’agora nun quies ascuchar, que

les palabres paecente ruíos inarticulaos,

pero créeme

que los díes pasiquín pasen,

y qu’a la vuelta de na

vas tastiar el fervolar de la risa

percorriéndote entera y

                              tamién, sí

otra vuelta; el descubrimiento vieyu y

maravillosu del amor. Entós,

yá te veremos entainando a apinar

los sentires,

               les fondísimes

voces qu’agora entierres, la lluz

descubridora y escaleciente del albanciar

too a xeitu enriba d’esta muerte,

d’esta solitú

qu’asemeya inasumible y ves

cásique definitiva, -que va ser,

y tovía nun sabes-

              preñez d’esi mañana.

 

Xuan Santori (Uviéu, 1968), tien espublizaos tres llibros: Zunes (1998), Les inconvenientes de la especie (2000) y Bis a bis (2004)

 

Lo meyor de too yera cuando tovía

yeres quien a llevame

a xocostrines

tu l’héroe l’únicu infalible peles

nueches facíemos un enguedeyu

de piernes na cama, yeren pá, ma, Diego,

yera too tan pequeño

que cabía nuna sábana qué prestoso

que too sea tan pequeño que nun

haya más llendes que’l cantu’l colchón

que nun haya más abellugu que’l to brazu

que les nueches nunca sean llargues

nin fríes nin vacíes

 

lo meyor de

too

yera cuando

too

yera tan cenciello

como trancar la puerta y nun t’afogar

 

tantes coses yeren lo meyor de too

 

Pablo Texón (Felechosa, 1977) tien espublizaos dos llibros de poemes: Toles siendes (2005) y La culpa y la lluz (2008)

 

Escribimos na llingua de la ñeve,

palabres blanques que caen na tierra

y nada semen nella, alpenes son

un falagu húmedu nos sos llabios secos,

un falagu namás y desfainse, bórrense.

 

Escribimos con palabres de ñeve,

falamos na so llingua blanca a una tierra

que ya nun la entiende, alpenes siente

el murmuriu suave d’una voz estraña,

el murmuriu d’un vientu suave que sopla y pasa.

 

Escribimos nel llibru de la ñeve,

páxines en blanco que falen de la tierra

de niundes y de la casa de naide, alpenes

memoria d’un día ensin nueche nin albancia,

memoria d’un nome que s’olvidó callando.

 

Escribimos con palabres de ñeve,

na llingua blanca de les xelaes y los muertos,

escamplamos fogueres na povisa frío, alpenes

solombres enfotaes nun llume escondíu,

solombres que prenden y estínguense soles.

 

Escribimos na llingua de la ñeve,

palabres blanques que caen na tierra

como estrelles ensin lluz o ecos roncos, alpenes

el murmuriu suave d’una voz estraña,

el murmuriu d’un vientu suave que sopla y pasa.

 

Pablo Antón Marín Estrada (Sama de Llangréu, 1966), tien espublizaos siete poemarios: Blues del llaberintu (1989), Les hores (1990), Díes d’inocencia (1992), Un tiempu meyor (1996), Otra edá (2000), Los baños del Tévere (2003) y Animal estrañu (2008).

 

Nun quiero más pasáu faraguya

nin más futuru a plazos,

nun quiero que m’aprendan los que saben

lo imprescindible que va ser siguir al tantu,

sentise conectáu…

Les coses son cencielles,

yo tengo dellos vezos,

a cachos soi bien fiel y, delles veces,

préstame porque siento que m’esnidio,

tengo media vida per delantre

y otra media ya gastada,

acostumase al tiempu, esi ye’l tratu.

 

Boni Pérez (Xixón, 1962) tien espublizáu’l llibru Ferviella (1995).