Na casa vieya, aquella empozada en claridá y xunos, n’arume
empapizón de figales: na vieya
casa onde s’espeseció la mio neñez.
Aquel cuartu al final d’esi pasiellu cuya estrenchura
facía cruxir a la
hora la siesta con pisaes d’esiliu, aquel cuartu
nel que naufragaba
peles tardes, cuando primero yera una sollume fresco pero dempués diba calistrando
esa lluz encetao que se vertía como pingarates de lleche nun concu
café puro; y tomaba’l día
color de merienda murnia. Afuera ferruñaba la reblanea’l
coche de Miguel, mediu soveráu ente ortigues, criando sobre la so
chapa verde
una costria de sol sarnosu. La goliosa mansedume del
llavaderu. La yedra caltrizando
la paré de la cuadra. A la vera, nun
tendeyonucu d’uralites, aquel ecu amargu qu’apodrecía
en vacíes
garrafes de gasoil tremaes pela clarixa estartalao. Aquel tendeyonucu
d’uralites nes que fervía’l cielu
devastando les tardes.
Héctor Pérez Iglesias (Llanera, 1978), amás d’un llibru en castellán, tien espublizao Prisión de náufragu (2005) y L’amarga cazumbre (2008).
Hai poques selmanes qu’acabé la primer llectura (seguro que va haber más..) de “L’amarga cazumbre”.
Paezme un mui bon poemariu que me valió amás pa conocer la poesía d’Héctor Pérez Iglesias. Recomiendo la so llectura. Bien posadina.
Un saludu.