Falaréi de la infancia ya d’un ríu
que corría monte abaxo hasta perdese
na l.l.ende de las tierras de los xaldos.
Un ríu qu’estremaba pueblos, acoyía nomes,
L’Ueyu Verde, Remoleiru, L.l.eirosu,
cuando cruciaba l.l.ibre las alturas.
Un ríu demorándose en bañales de piedra,
barcos pa las nubes ya espeyos
pa los güeyos profundos de las vacas.
Falaréi de muyeres embrocadas sobre l’augua,
de tardes de xabón ya cucharapas,
de la espuma delío, de palabras
que marchanon pa siempres ríu abaxu.
D’un mundu blancu boca arriba,
afitáu en corras de trapu na cabeza.
Falaréi d’un ríu que corría
arrastrando la tierra hasta perdese
nos escuros dominios de la sombra.
Taresa Lorences (Cueva, Salas, 1955) tien espublizaos dos llibros de poemes: El son de los picaportes (1994) y Sobre l’arena (2003)
