Raspiando’l cielu,
reposaba con nós l’atardecerín.
Sobre lo llano, la tentación
de llevantar ellí les tiendes nuestres,
na rasa al sol de primavera,
promesa de pa siempre.
Pa enxamás nun volver;
beber de la lluz esplandeciente
y dexar qu’españara’l so raigón nos pies curtíos.
Nun desandar les llombes,
nun triar los caminos pindios al pobláu,
desvistir el semblante del dolcu milenariu de la sombra
pa enxamás nun volver,
pa zarrar los sentíos a la enferma alcordanza
y ser el vientu cimble.
Trotiando, llegaron los caballos,
llimpia la clina de memoria y de nuedos,
namás la sede gobernando’l so instintu.
Llegar al manantial, a lo visiego.
Onde broten les fuentes.
Siguieron el camín,
descendieron les carbes,
galope polvorientu a la reguera,
a lo cabero’l valle.
Tres la esplandeciente lluz vieno la nueche,
el sabor de lo ariao marcó nos llabios
hasta calar el suañu y resfregar los güeyos
de fontana perdida.
Dexemos la esplanada, dimos la vuelta;
entendimos de sópitu la razón esencial
pa escoyer el llugar
onde plantar los fíos y poner sementera.
Lourdes Álvarez (Urbiés, 1961) tien espublizaos tres llibros: Aldabes del olvidu (1990), Mares d’añil (1992) y Son del Tardíu (2006), amás de les antoloxíes Poesía escoyida (1985-1997) y Mediando les distancies (2006)
