La yerba, frío y llento como la mano del dios, púnxome l’alba nos párpagos.
Buscábame como la piel d’un amante qu’en recuerdos convierte too aquello que toca.
Buscábame como sólo la guerra busca a los que duermen baxo’l vientre de ñube d’una paz suañada, como sólo la lluz busca a los ciegos que suañen la color de la tarde.
Traíame la mar y el cantar d’una bígara xunto al mio oyíu, esperecíu ecu d’una ciudá fundida nel Atlánticu.
Traíame’l mugor y l’ardicia d’un pueblu qu’abasaba tonelaes de roca muerto y tiempu fósil baxo les estrelles.
Nella l’amor y la fe sólo pallabres, más nada que soníos dulces pero estranxeros, luxos importaos d’ultramar, patayes copies de sentires reservaos a los dioses.
Uquiera que’l mirar fuera sangre, ellí los corazones alendando los deseyos de nueso, les fiebres posibles, positives, les caricies qu’alpenes se sienten en morriendo l’abrazu.
En tiempos d’inmortales, la edá yera otra, otru’l metal de les rises, otra la simetría de los llabios, otra mar
y otru mirar s’añudaben nes arestes del aire, y un marmullu de suaños secos al poner pie na tierra de siempres.
Vistíase de branu la solombra de los que pasaben saludando a los durmientes, y el claru tremor d’aquellos qu’amiyaben camín de casa dexaba un tastu agriu na verde mansedume de les siendes.
Había una fonte y un riscar d’esnales na vecindá del miel.
Xandru Fernández (Turón, 1970) tien espublizaos cuatro llibros: Primer bestiariu (1990), Breviariu de la diáspora (1993), Lletra muerto (1998.) y Servidume (2001).
